BAKI, AzerVoice, Fərid Mikayılov

Arsenal, Yuventusun yüksələn ulduzu Kənan Yıldızı heyətinə qatmaq üçün böyük addım atmağa hazırlaşır.

AzerVoice xəbər verir ki, iddialara görə, topçular türk yarımmüdafiəçi üçün 60 milyon avro və Leandro Trossardı əhatə edən mübadilə paketi təklif etməyə hazırdır.

20 yaşlı Yıldız cari mövsümdə yalnız beş oyunda 2 qol və 4 asistlə diqqətləri üzərinə çəkib. Bu performansı ilə o, Yuventusun toxunulmaz futbolçuları siyahısına daxil olub.

İtaliya mətbuatının yazdığına görə, Arsenalın baş məşqçisi Mikel Arteta və transfer komitəsi Yıldızı komandaya qatmaqda israrlıdır. Lakin Yuventus futbolçunu 80-100 milyon avro civarında dəyərləndirir və gənc oyunçunu itirmək istəmir. Klub artıq onu 2030-cu ilə qədər uzunmüddətli müqavilə ilə saxlamaq üçün danışıqlara başlayıb.

Arsenal yay transfer pəncərəsində hücum xəttinə Eberechi Eze, Viktor Gyokeres və Noni Maduekeyi cəlb etsə də, Arteta hələ də yaradıcılıq və gənclik axtarışındadır. Yıldızın sürəti, texnikası və oyun açmaq bacarığı isə “topçular”ın hücumuna əlavə güc gətirə bilər.

Hazırda danışıqların hansı mərhələdə olduğu məlum deyil, lakin Arsenalın Yıldızı transfer etmək arzusu aydın görünür.