BAKI,AzerVoice,Fərid Mikayılov
FIFA futbol qaydalarında köklü dəyişiklik etməyə hazırlaşır.
AzerVoice xəbər verir ki, yeni qaydaya əsasən, penalti vuruşunda qapıçı topu dəf etdikdə, topun istiqamətindən asılı olmayaraq “qapı vuruşu” qərarı veriləcək.
Məsələ FIFA prezidenti Canni İnfantino ilə Hakimlər Komitəsinin rəhbəri Pyerluidji Kollina arasında müzakirə olunub və tərəflər dəyişikliyin zəruriliyi barədə razılığa gəliblər. Qaydanın 2026–2027 mövsümündə qüvvəyə minməsi üçün Beynəlxalq Futbol Assosiasiyaları Şurasının (IFAB) təsdiqi tələb olunur.
Yeni sistemlə penalti zamanı digər futbolçuların cərimə meydançası ətrafında düzülməsinin və xətt pozuntusuna görə sarı vərəqə ilə cəzalandırılmasının qarşısı alınacaq.
FIFA həmçinin penaltilərdə “ikili toxunuş” qaydasında da dəyişiklik təklif edir. Əgər oyunçu topa ikinci toxunuşu qeyri-ixtiyari edərsə, vurulan qol qüvvədə saxlanılacaq. Bu dəyişikliyin səbəbi ötən mövsüm Çempionlar Liqasında “Atletiko Madrid”in futbolçusu Xulian Alvarezin penalti qolunun eyni vəziyyət üzündən ləğv olunmasıdır.
Qaydaların qüvvəyə minməsi üçün IFAB-ın rəsmən təsdiqi gözlənilir. Əgər qəbul olunarsa, futbol tarixində penalti qaydalarında ən böyük dəyişikliklərdən biri həyata keçiriləcək.
