BAKI, AzerVoice, Nailə Babazadə
UEFA Çempionlar Liqasının Liqa mərhələsinin IV turu çərçivəsində keçiriləcək “Qarabağ” – “Çelsi” (İngiltərə) matçı öncəsi mətbuat konfransları və media nümayəndələri üçün açıq məşqlərin vaxtları müəyyənləşib.
AzerVoice xəbər verir ki, komandamızın baş məşqçisi Qurban Qurbanovun iştirakı ilə keçiriləcək mətbuat konfransı noyabrın 4-də saat 17:00-da Tofiq Bəhramov adına Respublika stadionunda təşkil olunacaq. Daha sonra saat 18:00-da media nümayəndələri üçün açıq məşq keçiriləcək, məşqin ilk 15 dəqiqəsi ictimaiyyət üçün açıq olacaq.
Qonaq komandanın mətbuat konfransı və media üçün açıq məşqi isə İngiltərədə baş tutacaq.
Media nümayəndələri akkreditasiyalarını noyabrın 4-də saat 10:00-dan 16:30-dək Tofiq Bəhramov adına Respublika stadionunun mətbuat otağından götürə bilərlər.
Qeyd edək ki, “Qarabağ” – “Çelsi” görüşü noyabrın 5-də Tofiq Bəhramov adına Respublika stadionunda saat 21:45-də başlayacaq.