BAKI,AzerVoice, Orxan Qədirzadə

Türkiyənin Milli Müdafiə naziri Yaşar Gülər, Gürcüstanda baş verən və 20 türk hərbçisinin şəhid olması ilə nəticələnən C-130 tipli hərbi təyyarə qəzasına dair aparılan araşdırmaların son vəziyyəti barədə məlumat verib. Nazir qara qutunun hazırda TUSAŞ tərəfindən araşdırıldığını və ilkin nəticələrin əldə olunmasının ən azı iki ay çəkəcəyini açıqlayıb.

AzerVoice-un məlumatına görə, Kabinet iclası sonrası jurnalistlərin suallarını cavablandıran Yaşar Gülər bildirib ki, qəzaya məruz qalan təyyarənin qara qutuları Türkiyəyə gətirilib və ekspertiza işləri davam edir. "Qara qutu hazırda TUSAŞ tərəfindən incələnir. Qutuların açılması və ilkin nəticələrə çatmaq prosesi ən azı 2 ay çəkəcək. C-130 təyyarələrini 1957-ci ildən bəri istifadə edirik. Bu müddətdə yalnız bir dəfə mühərrik yanğını baş verib, ümumilikdə etibarlı təyyarədir” – deyə Gülər qeyd edib.

Nazir həmçinin ilkin araşdırmaların göstərdiyinə görə, təyyarənin əvvəlcə quyruq hissəsinin qırıldığını, ardından isə gövdənin üç hissəyə bölündüyünü bildirib.

Prezident Rəcəb Tayyib Ərdoğan isə məsələ ilə bağlı verdiyi açıqlamada qəzaya dair məlumatların şəffaf şəkildə paylaşılacağını vurğulayıb.
“Heyətimizin topladığı məlumatlar və qara qutunun təhlili nəticəsində, 20 şəhid verdiyimiz bu faciənin səbəbləri çox daha aydın olacaq. Bu məlumatlar ilk növbədə şəhid yaxınları olmaqla, bütün ictimaiyyətlə açıq şəkildə bölüşüləcək.”-deyə prezident bildirib.

Hadisə ilə bağlı rəsmi araşdırmalar davam edir. Təyyarənin qəza səbəblərinin tam olaraq müəyyənləşdirilməsi üçün həm qara qutuların detallı təhlili, həm də hadisə yerində aparılan texniki araşdırmalar mühüm əhəmiyyət daşıyır.