BAKI, AzerVoice, Fərid Mikayılov

Barselona klubunun prezidenti Joan Laporta, maliyyə böhranı səbəbindən Lionel Messinin komandadan ayrılmasının klubla münasibətlərdə gərginlik yaratdığını, lakin sonradan bu münasibətlərin bərpa olunduğunu bildirib.

AzerVoice xəbər verir ki, Laportanın sözlərinə görə, argentinalı ulduzun Barselonaya qayıdışı və “Kamp Nou”da xüsusi vida oyununun keçirilməsi hələ də gündəmdədir.

Messi 2021-ci ildə Barselonadan ayrılaraq PSJ klubuna keçmişdi. Klubun yeni müqavilə üçün vəsait ayıra bilməməsi səbəbindən baş verən bu ayrılıq həm azarkeşlər, həm də rəhbərlik üçün çətin dövr yaratmışdı.

Kataloniya nəhəngi ilə bütün karyerasını keçirən Messi, PSJ-də keçirdiyi iki mövsümdən sonra 2023-cü ildə ABŞ-ın İnter Mayami klubuna transfer olmuşdu.

“Messi ilə münasibətlərimiz çox yaxşı idi, lakin müqavilə yenilənmədiyi vaxt əlaqələr zədələndi. Daha sonra bu münasibət müəyyən dərəcədə bərpa olundu. Biz onun Barselonada layiq olduğu şəkildə xatırlanmasını istəyirik”- deyə o bildirib.

Klub prezidenti, “Kamp Nou” stadionunun yenidənqurma işləri tamamlandıqdan sonra Messinin burada şərəf matçında meydana çıxmasının planlaşdırıldığını deyib.

“Ümid edirik ki, o, layiq olduğu böyük ehtiramla qarşılanacaq. Messi Barselonanın tarixinə adını qızıl hərflərlə yazdırıb”- deyə Laporta vurğulayıb.

Laporta klubun gələcəyi barədə danışarkən 18 yaşlı gənc istedad Lamin Yamalın adını xüsusi qeyd edib. Hazırda zədəsini sağaldan futbolçunun 26 oktyabrda Real Madridlə keçiriləcək El Klasiko oyununa qədər hazır olacağı gözlənilir.