BAKI, AzerVoice, Fərid Mikayılov

Dünya şöhrətli irlandiyalı döyüşçü, UFC-nin keçmiş ikiqat çempionu Konor Makqreqor dörd illik fasilədən sonra yenidən döyüşə çıxacaq.

AzerVoice xəbər verir ki, onun növbəti rəqibi Mayk Perri – Ceremi Stivens qarşılaşmasının qalibi olacaq.

BKFC (Bare Knuckle Fighting Championship) prezidenti Devid Feldman mətbuat konfransında Makqreqorun döyüşə hazırlaşdığını açıqlayıb.

“Bu gün burada dostum və biznes-partnyorum Konor Makqreqor olmalı idi. Təəssüf ki, gəlişi baş tutmadı, çünki hazırda tam diqqətini hazırlığa yönəldib. O, əla formada və tezliklə rinqə çıxacaq”- deyə o bildirib.

Makqreqor UFC tarixində eyni anda iki çəki dərəcəsində çempion kəmərini qazanan ilk idmançı olub. O, əvvəlcə yarım yüngül çəkidə Çad Mendes üzərində qələbə qazanaraq ilk titulunu əldə edib. Daha sonra isə yüngül çəkidə Eddi Alvaresi nokauta salaraq ikinci kəmərə sahib çıxıb.

Ulduz döyüşçünün son çıxışı 11 iyul 2021-ci ildə UFC 264 turnirində baş tutub. Rəqibi amerikalı Dastin Porye olub. Lakin trilogiya qarşılaşması gözlənilmədən bitib – Makqreqor ilk raundda ayaq biləyini sındıraraq texniki məğlubiyyət alıb.

2024-cü ildə BKFC-nin səhmdarlarından birinə çevrilən Makqreqor, artıq təşkilatın əsas simalarından hesab olunur. Ənənəvi boksun qaydalarına yaxın, lakin təhlükəsizlik tədbirləri ilə keçirilən “yalın yumruq döyüşləri” sürətlə populyarlıq qazanır.

Makqreqorun gözlənilən döyüşü həm onun uzun fasilədən sonra dönüşü, həm də BKFC-nin qlobal miqyasda izlənilirliyini artıracaq.