BAKI,AzerVoice, Fərid Mikayılov

MMA dünyasının ulduzu, sabiq UFC ağır çəkidə çempionu Con Cons yenidən oktaqona qayıda biləcəyini açıqlayıb.

AzerVoice xəbər verir ki, döyüşçü sosial şəbəkədə etdiyi paylaşımda məşqlərini davam etdirdiyini və Ağ Ev turnirində iştirak ehtimalına optimist yanaşdığını bildirib.

"Məşqlərimi davam etdirirəm və Ağ Ev turnirində iştirak imkanına nikbin baxıram"- deyə o vurğulayıb.

UFC prezidenti Dana Vayt isə Consun qayıdışına skeptik yanaşdığını bildirib. UFC 319 turniri ərəfəsində mətbuat konfransında Vayt, Consa etibar etmədiyini və belə bir ciddi turnirdə ona önəmli yer verməyəcəyini vurğulayıb.

"Mən artıq demişəm ki, ona etibar etmirəm. Biz heç danışmırıq belə. Mənə sual verirlər ki, o, üç ayda nə edə bilər ki, fikrim dəyişsin? Mənim cavabım budur: şans – milyardda bir"- deyə UFC rəhbəri qeyd edib.

Qeyd edək ki, 37 yaşlı döyüşçü bir müddət əvvəl karyerasını başa vurduğunu açıqlamış, çempionluq kəməri isə britaniyalı Tom Aspinalla keçmişdi. Onun qərarı bir çoxları üçün gözlənilməz olub.

Cons idman karyerası ərzində dəfələrlə qalmaqallarla yadda qalıb. 2015-ci ildə yol qəzasından sonra hadisə yerini tərk etdiyinə görə, 2016 və 2017-ci illərdə isə dopinq testlərinin müsbət nəticələnməsinə görə çempionluq titullarından məhrum edilmişdi.

2025-ci ilin fevralında Consun adı yenidən avtomobil qəzası ilə bağlı istintaqda hallanıb. Lakin idmançı karyerasını bu səbəbdən dayandırdığını inkar edərək mediada yayılan iddiaları “əsassız şayiələr” adlandırıb.