BAKI,AzerVoice
UFC-nin canlı əfsanəsi Con Cons ABŞ Prezidenti Donald Trampın təşəbbüsü ilə 2026-cı ildə Ağ Evdə keçirilməsi planlaşdırılan tarixi turnirdə iştirak etməyə hazır olduğunu bəyan edib.
AzerVoice xəbər verir ki, döyüşçü, həmin gecədə titul uğrunda amerikalı idmançının döyüşməsinin daha simvolik və anlamlı olacağını bildirib.
“İstərdim ki, Ağ Evdəki bu turnirdə ilin sonunda titul kəmərinə sahib olan idmançı ilə döyüşüm. Hazırda bu kəmər Tom Aspinalla məxsusdur, amma ilin sonunda kimin çempion olacağı bəlli deyil. Belə bir gündə amerikalının titul uğrunda döyüşməsi uyğun olardı. Bu, tarixi hadisə olacaq. Heç nəyi söz verə bilmərəm, amma həmin gecə turnirin iştirakçı siyahısında olacağıma dair güclü hissim var”- deyə o bildirib.
Xatırladaq ki, Donald Tramp bir müddət əvvəl 2026-cı ildə UFC turnirlərindən birinin Ağ Evdə keçirilə biləcəyini açıqlayıb. Prezidentin favoritlərindən biri hesab edilən Con Consun bu tədbirdə yer alması gözlənilir.
37 yaşlı amerikalı döyüşçü Con Cons MMA karyerasına 2008-ci ildə başlayıb. O, UFC tarixində iki çəki dərəcəsində – yarım-yüngül (2011–2015, 2018–2020) və ağır çəki (2023–2025) üzrə dünya çempionu olub.
Con Consun ümumi peşəkar döyüş statistikası 28 qələbə və 1 məğlubiyyətdən ibarətdir. Tək məğlubiyyəti isə mübahisəli diskvalifikasiya nəticəsində qeydə alınıb. Sonuncu döyüşünü 2024-cü ilin noyabrında UFC 309 turnirində keçirmiş və Sitipe Mioçiçi üçüncü raundda nokautla məğlub edərək titulunu qorumuşdu.
Daha sonra o, karyerasını bitirdiyini elan edərək çempion kəmərini təhvil vermişdi. Lakin Trampın açıqlamasından sonra Cons UFC-yə qayıtdığını bəyan edib.
MMA dünyasının digər ulduzları da Con Consun döyüşçü kimi əvəzolunmaz statusunu dəfələrlə vurğulayıblar. Rusiya əsilli keçmiş UFC çempionu Həbib Nurməhəmmədov onu “tarixdəki ən böyük döyüşçü” adlandırmışdı.
