BAKI, AzerVoice, Səməd Əyyubov

1998-ci ilin dünya və 2000-ci ilin Avropa çempionu Zinəddin Zidan 2026-cı il dünya çempionatından sonra Fransa millisinin baş məşqçisi olacaq.

AzerVoice xəbər verir ki, bu barədə “Defensa Central” portalı məlumat yayıb.

Yanvar ayında Fransa Futbol Federasiyası bildirmişdi ki, hazırkı baş məşqçi Didye Deşam 2026-cı ildə Kanada, ABŞ və Meksikada keçiriləcək dünya çempionatından sonra vəzifəsini tərk edəcək.

Qeyd edək ki, 56 yaşlı Deşam 2012-ci ildən Fransa yığmasına rəhbərlik edir. Onun rəhbərliyi dövründə komanda 166 oyun keçirib, 106 qələbə qazanıb, 31 heç-heçə edib və 29 məğlubiyyət alıb. Deşamın çalışdırıcılığı altında Fransa millisi 2018-ci ildə dünya çempionu, 2022-ci ildə Millətlər Liqasının qalibi olub, həmçinin 2016-cı il Avropa çempionatının və 2022-ci il dünya çempionatının gümüş medalını qazanıb.

53 yaşlı Zidanın son məşqçilik fəaliyyəti İspaniyanın “Real Madrid” klubunda olub. O, bu komandaya 2016–2018-ci və 2019–2021-ci illərdə rəhbərlik edib. Onun rəhbərliyi altında madridlilər üç dəfə UEFA Çempionlar Liqasının, iki dəfə İspaniya çempionatının və iki dəfə İspaniya Superkubokunun qalibi olublar.

Futbolçu karyerasında Zidan Fransanın “Kann” və “Bordo” klublarında, İtaliyanın “Yuventus”unda və “Real Madrid”də çıxış edib. O, 2003-cü ildə “Real”la İspaniya çempionu olub, 2002-ci ildə isə Çempionlar Liqasının finalında Almaniyanın “Bayer” klubuna vurduğu qələbə qolu ilə (2:1) yadda qalıb. “Yuventus”la iki dəfə İtaliya çempionu olan Zidan Fransa millisində 108 oyun keçirib, 31 qol vurub, 29 qol ötürməsi verib. O, Fransa yığması ilə 1998-ci ildə dünya çempionu, 2006-cı ildə dünya çempionatının gümüş mükafatçısı və 2000-ci ildə Avropa çempionu olub.