BAKI, AzerVoice
İtaliya futbolunun əfsanəvi simalarından biri olan Andrea Pirlo yenidən məşqçiliyə qayıdıb.
AzerVoice xəbər verir ki, Milan və Yuventus komandalarında keçmiş parlaq karyerası ilə tanınan Pirlo, Birləşmiş Ərəb Əmirliklərinin ikinci liqasında çıxış edən “Dubai United” klubunun baş məşqçisi vəzifəsinə təyin olunub.
“United FC Andrea Pirlonun birinci komandanın baş məşqçisi təyin olunduğunu rəsmi olaraq elan etməkdən məmnundur. O, klubun dəyərlərini və hədəflərini özündə təcəssüm etdirir və komandamızı növbəti mərhələyə daşıyacaq əsas fiqurlardan biri olacaq,” – klubun prezidenti İlie Çebanu açıqlamasında bildirib.
Pirlo bu vəzifəyə sonuncu iş yerindən – İtaliya B Seriyasında çıxış edən “Sampdoria” klubundakı fəaliyyətdən cəmi 11 ay sonra təyin edilib. O, 2023-cü ilin iyulundan 2024-cü ilin avqustunadək “Sampdoria”ya rəhbərlik etmiş, lakin zəif nəticələr səbəbindən 29 avqust 2024-cü ildə postunu tərk etmişdi.
İtaliyalı mütəxəssisin daha əvvəlki məşqçilik təcrübələri arasında “Juventus” (2020–2021) və Türkiyənin “Fatih Karagümrük” klubları da yer alır. Hər iki klubda Pirlo ilə əməkdaşlıq gözləniləndən əvvəl başa çatmışdı.
2022-ci ildə təsis olunan “Dubai United” klubunun əsas məqsədi BƏƏ Pro Liqasına vəsiqə qazanmaqdır. Pirlo artıq Dubayda yerləşərək, yeni mövsüm hazırlıqlarına start verib. Komanda ilk oyununu 20 sentyabrda səfərdə “Əl-Ta'id” klubuna qarşı keçirəcək.
