BAKI,AzerVoice, Fərid Mikayılov
Qazaxıstan Respublikasında 2026-cı il rəsmi olaraq “Rəqəmsallaşma və Süni İntellekt İli” elan olunub.
AzerVoice xəbər verir ki, bununla bağlı Qazaxıstan Prezidenti Kasım-Jomart Tokayev müvafiq fərman imzalayıb.
Fərmanda qeyd olunur ki, qərar ölkədə rəqəmsallaşmanın daha da sürətləndirilməsi və süni intellekt texnologiyalarının bütün sahələrdə geniş tətbiqinin təmin edilməsi məqsədi daşıyır. Sənədə əsasən, fərman imzalandığı gündən qüvvəyə minib.
Prezident Tokayev Yeni il münasibətilə xalqa müraciətində də 2026-cı ilin Qazaxıstanda süni intellekt konsepsiyası əsasında keçəcəyini bildirmişdi. O, Qazaxıstanın tam rəqəmsal dövlətə çevrilməsinin strateji prioritet olduğunu vurğulayaraq, bu məqsədlə 2026-cı ilin “Rəqəmsallaşma və Süni İntellekt İli” elan ediləcəyini açıqlamışdı.
Onun sözlərinə görə, qabaqcıl texnologiyaların tətbiqi ölkənin iqtisadi, sosial və institusional potensialını əhəmiyyətli dərəcədə artıracaq.