BAKI, AzerVoice

Azərbaycan və Türkiyə arasında ümumilikdə 33 milyard kubmetr təbii qazın tədarükünü nəzərdə tutan uzunmüddətli saziş imzalanıb.

Bu barədə Türkiyənin enerji və təbii ehtiyatlar naziri Alparslan Bayraktar məlumat verib. Nazir bildirib ki, razılaşma iki gün əvvəl əldə olunub və Xəzər dənizində yerləşən Abşeron qaz yatağını əhatə edir.

Onun sözlərinə görə, saziş çərçivəsində Abşeron yatağından ildə 2,25 milyard kubmetr olmaqla 15 il müddətində Türkiyəyə qaz tədarükü həyata keçiriləcək. Razılaşma 2029-cu ildə qüvvəyə minəcək və 2040-cı illərə qədər davam edəcək.

Bayraktar qeyd edib ki, tədarük mövcud infrastrukturdan istifadə edilməklə reallaşdırılacaq və Azərbaycan qazı Bakı–Tbilisi–Ərzurum boru kəməri vasitəsilə Türkiyəyə çatdırılacaq.

Eyni zamanda, Türkiyənin Enerji Bazarını Tənzimləmə Qurumunun (EPDK) açıqladığı məlumatlara əsasən, mövcud müqavilələr çərçivəsində Azərbaycan 2025-ci ilin yanvar–oktyabr aylarında Türkiyəyə 9,798 milyard kubmetr təbii qaz ixrac edib. Bu göstərici ötən ilin eyni dövrü ilə müqayisədə 3,5 faiz artım deməkdir.

Yeni saziş Azərbaycan–Türkiyə enerji tərəfdaşlığının daha da möhkəmləndirilməsi və regionda uzunmüddətli qaz təchizatının təmin olunması baxımından strateji əhəmiyyət daşıyır.