Bakı. AzerPress:

Bu il ikinci dəfə festivala start vermişik.

İdman.biz xəbər verir ki, bunu Milli Olimpiya Komitəsinin (MOK) təsis etdiyi “İdman Filmləri və Proqramları Milli Televiziya Festivalı”nın münsiflər heyətinin mətbuat konfransında MOK-un və Azərbaycan Atıcılıq Federasiyasının vitse-prezidenti Zemfira Meftahətdinova deyib

Olimpiya çempionu bildirib ki, ilk dəfə olaraq 5 nominasiya üzrə layihələrə qiymət veriləcək.

“Bunlar qadın və uşaq idmanı ilə bağlıdır. Dünyada qadın idmanına çox böyük maraq göstərilir. Həmçinin dünya üzrə idmanda qadınlar üstünlük təşkil edir. Beynəlxalq Olimpiya Komitəsinin də şərti budur ki, idmançıların 50 faizi qadınlar olsun. Düşünürəm ki, festival ötən ildə olduğu kimi bu il də çox böyük marağa səbəb olacaq”, - deyə o bildirib.

Azərbaycan Kinematoqrafçılar İttifaqının katibi Oleq Səfərəliyev festivalın ənənəvi hal alacağına inandığını deyib.

“Nəticədə daha yaxşı layihələr və filmlərin şahidi olacağıq. Milli Olimpiya Komitəsi idmanın inkişafına böyük təkan verir. Bu il daha maraqlı layihələr görəcəyimizə əminəm”, - deyə Oleq Səfərəliyev qeyd edib .

“Bakılı oğlanlar” komandasının və münsiflər heyətinin üzvü Ənvər Mansurov isə idmançıların nəticələr qazanması üçün illərlə əziyyət çəkdiyini vurğulayıb və bildirib ki, insanlar filmlər nəticəsində idmançılarımızın nə qədər əziyyət çəkdiyini görməlidirlər.

“Vətən” Uşaq Yaradıcılıq Mərkəzinin təsisçisi Zəhra Quliyeva layihənin şəffaf şəkildə keçirildiyini qeyd edib.

“Bunun cəmiyyətə yaralı olacağına inanıram. İdman sahəsində gənclərə və uşaqlara xüsusi təkan verilməlidir. Dövlətimizin başlıca apardığı siyasətdə bundan ibarətdir”, - deyə Z.Quliyeva vurğulayıb.

Qeyd edək ki, festivalın informasiya dəstəkçiləri Trend.Az, Day.Az, Milli.Az, Azernews.Az, Turkic.World, İdman.Biz, və AZTV, AZTV İdman, CBC SPORT, ARB, SPACE, Olympic.az, OlimpiyaDünyası və Sportsmandır.

İdman.biz