BAKI,AzerVoice

Kiçik Orta Biznesin İnkişafı Agentliyində (KOBIA) "II Türk Ticarət Sərgisi - Türk Dövlətləri Ticarət və İnvestisiya Əməkdaşlıq Forumu və Sərgisi"nin mətbuat konfransı keçirilib.

AzerVoice xəbər verir ki, tədbirə Azərbaycan himninin səsləndirilməsi ilə başlanıb.

Daha sonra tədbir iştirakçıları, Türk dövlətləri arasındakı investisiya və ticarət əlaqəli barədə fikirlərini bölüşüblər.

Qeyd edək ki, Türk dövlətləri arasında iqtisadi əməkdaşlığı gücləndirmək məqsədilə təşkil olunan Türk Ticarət Sərgisi 2025-ci il iyunun 10-dan 12-dək Baku Expo Center-də keçiriləcək.

Sərgi, Azərbaycan, Türkiyə, Qazaxıstan, Qırğızıstan, Özbəkistan, Türkmənistan, Macarıstan və Şimali Kipr Türk Respublikası kimi ölkələrin iştirakı ilə baş tutacaq.

Sərginin əsas məqsədi türk dövlətləri arasında ticarət, sənaye, texnologiya, xidmət və investisiya sahələrində əməkdaşlığı genişləndirmək və yeni bazarlara çıxış imkanlarını artırmaqdır.

Sərgi proqramı konfranslar, B2B (ikitərəfli işgüzar görüşlər), françayzinq müzakirələri, expo ziyarətləri və Bakı turu kimi müxtəlif tədbirləri əhatə edəcək. Əlavə olaraq, sərgi çərçivəsində “Türk Dövlətlərinin İqtisadi Gücü və Yatırım Fırsatları”, “Türk Dünyasında Qadın Sahibkarlığı”, “Türk Dünyasında Françayzinq və Markalaşma” kimi tematik panellər də təşkil ediləcək.

Sərgidə şirkətlər üçün ödənişli və ödənişsiz iştirak imkanları təklif olunur. Ödənişli xidmətlərə stend qurulması, tərcümə və turizm xidmətləri daxildir. Eyni zamanda sərginin ana sponsoru olmaq imkanı da mövcuddur. Sponsor paketləri 8.000$-dan başlayaraq 70.000$-a qədər dəyişir.

Qeyd edək ki, Türk dövlətlərinin ümumi əhalisi 178 milyon nəfəri, iqtisadi böyüklüyü isə 1.9 trilyon ABŞ dollarını ötür. Bu ölkələr arasında daxili ticarət dövriyyəsi də getdikcə artır. Ən çox ixrac olunan məhsullara neft, qaz, maşın və elektronika, kənd təsərrüfatı məhsulları, tekstil və qida məhsulları daxildir.