BAKI,AzerVoice

Liviyanın mərhum lideri Müəmmər Qəddafinin oğlu Hannibalın Livanda saxlanılması fonunda səhhətinin pisləşməsi ilə bağlı yayılan xəbərlər bir çox liviyalını onun azadlığa buraxılması üçün təcili tədbirlər görməyə çağırmağa vadar edib.

AzerVoice xəbər verir ki, Hannibalın Beyrutdakı Daxili Təhlükəsizlik Qüvvələrinin binasında saxlanıldığı həbsxanadan xəstəxanaya köçürüldüyü bildirilir. Mətbuatda onun vəziyyətinin ağır olduğu və “həyatına təhlükə yaradan sağlamlıq böhranı” yaşadığı barədə xəbərlər yayılıb.

Liviya Qəbilələr İttifaqının Xarici Əlaqələr üzrə müşaviri Xalid əl-Ğuveyl “Aş-Şərq əl-Əvsat” qəzetinə açıqlamasında Livan hakimiyyətini “ədalətdən uzaq qisas atmosferinə son qoymağa” çağırıb.

“Hannibal Qəddafi artıq illərdir heç bir ittiham irəli sürülmədən həbsdə saxlanılır. Bu, hüquqi və insani prinsiplərlə ziddiyyət təşkil edir.”-deyə o bildirib.

Onun sözlərinə görə, Livan hökuməti istəyirmi ki, Qəddafinin oğlu həbsdə ölsün? Əgər bu baş versə, bu, Livan hüquq sisteminin tarixində silinməz bir ləkə olacaq.”

Liviya daxilində səslənən çağırışlarda Hannibalın azadlığa buraxılması üçün Tripolidəki səlahiyyətlilərin dərhal müdaxilə etməsi tələb olunur.

Mətbuata görə, Hannibal Qəddafi 2024-cü ilin 22 iyununda sağlamlığının kəskin pisləşməsi və aclıq aksiyasına başlamasından sonra xəstəxanaya yerləşdirilib. O, 2015-ci ildən bəri məhkəməsiz şəkildə həbsdə saxlanıldığına etiraz olaraq aclıq elan etmişdi.