BAKI, AzerVoice
Polşada aparılan yeni araşdırmaya görə, evlilik kişilərdə piylənmə riskini üç dəfəyə qədər artırır, lakin bu təsir qadınlarda müşahidə olunmur. Tədqiqat nəticələri bu il İspaniyanın Malaga şəhərində keçirilən Avropa Piylənmə Konqresində təqdim olunub.
Polşanın Varşava şəhərindəki Milli Kardiologiya İnstitutunun alimləri yaş ortalaması 50 olan 2.405 nəfərin tibbi və ümumi sağlamlıq məlumatlarını təhlil ediblər. Məqsəd bədən çəkisi artımı ilə yaş, ailə vəziyyəti, psixi sağlamlıq və həyat tərzi kimi amillər arasındakı əlaqəni müəyyənləşdirmək olub.
Aparılan statistik analizlər göstərib ki, evli kişilərin obez
olmaq ehtimalı subay kişilərlə müqayisədə 3,2 dəfə çoxdur. Eyni
zamanda, evlilik kişilərdə artıq çəkili olmaq riskini 62 faiz,
qadınlarda isə 39 faiz artırır. Lakin
qadınlarda evliliklə əlaqəli olaraq obezlik riskində ciddi artım
müşahidə edilməyib.
Mütəxəssislər bu dəyişiklikləri əsasən evli kişilərin daha çox kalori qəbul etməsi və az hərəkət etməsi ilə izah edirlər.
Proqnozlara görə, 2050-ci ilə qədər dünya üzrə böyüklərin yarısından çoxu və uşaqların üçdə biri artıq çəkili olacaq.
