BAKI,AzerVoice, Fərid Mikayılov

Qırğızıstan Prezidenti Sadır Japarov Şanxay Əməkdaşlıq Təşkilatının (ŞƏT) sammitində çıxışı zamanı iqlim dəyişikliyinin artıq abstrakt təhlükə yox, real təhlükə olduğunu bəyan edib.

AzerVoice xəbər verir ki, Japarov vurğulayıb ki, ŞƏT-ə üzv ölkələrin birgə fəaliyyəti qlobal istiləşmənin qarşısının alınmasında mühüm rol oynaya bilər.

O, qeyd edib ki, Qırğızıstan ekoloji sahədə əməkdaşlığı genişləndirmək niyyətindədir.

“Biz ŞƏT ölkələrinə iqlim dəyişikliyi ilə mübarizəni gücləndirmək və ‘yaşıl’ iqtisadiyyat sahəsində birgə layihələri artırmaq üçün əməkdaşlığı fəallaşdırmağı təklif edirik” – deyə Japarov bildirib.

Sammit ərəfəsində keçirilən “ŞƏT ölkələrində ekoloji təhlükəsizlik” mövzusunda dəyirmi masada Qırğızıstan nümayəndələri ölkənin dağ ekosistemlərinin qorunması, dayanıqlı inkişaf və iqlim dəyişikliyi ilə mübarizə istiqamətində gördüyü tədbirlər barədə məlumat veriblər.

Çıxışlarda Qırğızıstanın hidroenerji potensialı, bərpa olunan enerji sahəsində xarici investorlarla əməkdaşlığa açıq olması vurğulanıb. Ölkədə son iki ildə 14 kiçik SES inşa edilib, hər il 8 milyon ağac əkilib, dağ rayonlarında infrastruktur layihələri icra olunub, telemedisina sahəsində beynəlxalq maliyyələşməli proqram həyata keçirilib.

Sadır Japarov bildirib ki, 2027-ci ildə Bişkekdə keçiriləcək “Bişkek+25” Qlobal Dağ Sammiti yalnız son illərin yekunu deyil, həm də beynəlxalq əməkdaşlığın yeni mərhələsinin başlanğıcı olacaq.

“Qırğızıstan dağlıq ölkədir. Bizim səsimiz bütün dünya üçün eşidilməlidir. Qlobal dağ dialoqunun dəstəklənməsi ümumi maraqlar naminə vacibdir” – deyə o əlavə edib.