BAKI,AzerVoice, Fərid Mikayılov

BMT Baş Assambleyasının 80 illik yubiley sessiyası çərçivəsində ABŞ Prezidenti Donald Tramp ilə Özbəkistan Prezidenti Şavkat Mirziyoyev arasında görüş keçirilib.

AzerVoice xəbər verir ki, liderlər iki ölkə arasındakı strateji əməkdaşlığın genişləndirilməsi və gündəmdəki beynəlxalq məsələləri müzakirə ediblər.

Görüşdə tərəflər, xüsusilə mülki aviasiya, dağ-mədən sənayesi, mühüm minerallar, maliyyə, innovasiya, kimya və enerji sektorlarında əməkdaşlığın dərinləşdirilməsinə dair razılığa gəliblər.

ABŞ Prezidenti Tramp, Mirziyoyevin ABŞ-ın 50-dən çox aparıcı şirkət və bank rəhbərləri ilə görüşlərini yüksək qiymətləndirib.

Tramp bildirib ki, Özbəkistan Prezidentinin bu dəfəki ABŞ səfəri çərçivəsində 105 milyard dollarlıq müqavilə və layihələr imzalanıb. Müqayisə üçün, Mirziyoyevin 2018-ci ildəki Vaşinqton səfərində bu rəqəm 19,4 milyard dollar təşkil etmişdi.

Ən böyük müqavilələrdən biri “Boeing” şirkətindən 8,5 milyard dollar dəyərində “787-9 Dreamliner” sərnişin təyyarələrinin alınması olub. Liderlərin sözlərinə görə, bu və digər layihələr hər iki ölkədə on minlərlə yeni iş yerinin açılmasına səbəb olacaq.

Görüşün sonunda Özbəkistan Prezidenti Şavkat Mirziyoyev, ABŞ Prezidenti Donald Trampı Özbəkistana rəsmi səfərə dəvət edib.