BAKI, AzerVoice, Nailə Babazadə

İran Prezidenti Məsud Pezeşkian Avrasiya İqtisadi İttifaqının Ali Şurasının iclasına göndərdiyi mesajda İranla ittifaqa üzv ölkələr arasında əməkdaşlığın strateji və uzunmüddətli xarakter daşıdığını vurğulayıb.

AzerVoice xəbər verir ki, Prezident bildirib ki, bu əməkdaşlıq milli suverenliyin möhkəmləndirilməsi, ticarət və nəqliyyat əlaqələrinin asanlaşdırılması, enerji təhlükəsizliyinin gücləndirilməsi, yeni texnologiyaların inkişafı və maliyyə-bank infrastrukturunun formalaşdırılması baxımından mühüm əhəmiyyət kəsb edir.

Pezeşkian mesajında Avrasiya İqtisadi İttifaqının İranın xarici siyasəti və iqtisadi diplomatiyasında xüsusi yer tutduğunu qeyd edərək, tərəflər arasında azad ticarət sazişinin icrasının və İranın bu qurumda müşahidəçi statusu əldə etməsinin regional iqtisadi əməkdaşlığın genişlənməsinə töhfə verəcəyini bildirib. O, mədəni və tarixi ortaq dəyərlər, eləcə də coğrafi yaxınlığın regional inteqrasiyanın inkişafı üçün əlverişli zəmin yaratdığını vurğulayıb.

İran Prezidenti əlavə edib ki, Tehran regional və çoxtərəfli mexanizmlərdə fəal iştiraka önəm verir və Avrasiya məkanında ticarət, enerji, nəqliyyat və texnologiya sahələrində strateji əməkdaşlığın genişləndirilməsini prioritet hesab edir. Onun sözlərinə görə, bu yanaşma Avrasiya regionunda sabitlik, qarşılıqlı etimad və birgə iqtisadi inkişafın güclənməsinə xidmət edir.