BAKI, AzerVoice, Nailə Babazadə
Brüssel Hava Limanı hava məkanında pilotsuz uçuş aparatlarının (PUA) müşahidə edildiyinə dair məlumat daxil olduqdan sonra hava hərəkətinə bağlanıb.
AzerVoice xəbər verir ki, Belçika Hava Nəqliyyatına Nəzarət Xidməti dronların görünməsi ilə bağlı xəbərdarlıqdan sonra hava limanının uçuşlara müvəqqəti olaraq bağlandığını açıqlayıb.
Brüssel Hava Limanının sözçüsü hava limanında uçuşların tamamilə dayandırıldığını təsdiqləyib.
Belçika mediasının məlumatına görə, Brüssel üzərində azı üç pilotsuz uçuş aparatı aşkar edilib. Mülki Aviasiya İdarəsi və polis həmin dronların operatorlarını müəyyən etmək üçün istintaqa başlayıb.
Rəsmi qaydalara əsasən, idarə olunan hava məkanında pilotsuz uçuş aparatlarının uçuşuna, aviasiya təhlükəsizliyi üçün yüksək risk yaratdığına görə, icazə verilmir. Kiçik bir dronun belə təyyarə ilə toqquşması, xüsusən qalxış və eniş zamanı ciddi zərərlərə səbəb ola bilər.
Brüssel Hava Limanının nə qədər müddət bağlı qalacağı hələlik məlum deyil.