BAKI, AzerVoice, Nailə Babazadə

Hind okeanındakı ada dövləti Maldivlər, 1 yanvar 2007-ci ildən sonra doğulan hər kəsə tütün məhsullarını almağı, istifadə etməyi və onlara satmağı qadağan edərək, dünyada “nəsillərarası siqaret qadağası” tətbiq edən yeganə ölkə olub.

AzerVoice xəbər verir ki, Maldivlər Səhiyyə Nazirliyinin açıqlamasına görə, bu qərar Prezident Məhəmməd Muizzunun təşəbbüsü ilə ilin əvvəlində qəbul edilib və 1 noyabrdan qüvvəyə minib.

Nazirlik bildirib ki, yeni tənzimləmə “ictimai sağlamlığın qorunması və tütündən azad nəsil yetişdirilməsi” məqsədi daşıyır.

Qaydalara əsasən, 2007-ci il yanvarın 1-dən sonra doğulan şəxslər tütün məhsullarını ala, istifadə edə və sata bilməyəcəklər. Satıcılar isə satışdan əvvəl alıcının yaşını yoxlamağa borcludurlar.

Lüks turizmi ilə tanınan, min 191 mərcan adasından ibarət olan Maldivlərdə bu qayda turistlərə də şamil olunur.

Bundan əlavə, ölkədə hər yaş qrupu üçün elektron siqaret və buxar cihazlarının idxalı, satışı, paylanması, saxlanması və istifadəsi tamamilə qadağan edilib.

Yaşı çatmayanlara tütün məhsulu satan şəxslər 50 min rufiya (təxminən 3.200 ABŞ dolları), elektron siqaret istifadə edənlər isə 5 min rufiya (təxminən 320 dollar) cərimə ediləcəklər.

Qeyd edək ki, oxşar “nəsillərarası siqaret qadağası” qanun layihəsi hazırda Böyük Britaniyada müzakirə mərhələsindədir.

Bu tətbiqi ilk həyata keçirən Yeni Zelandiya isə 2023-cü ilin noyabrında qüvvəyə minən qanunu bir ildən də az müddət sonra ləğv etmişdi.