BAKI, AzerVoice

22 aprel 2025-ci il tarixində Türkiyə və Maldiv Adaları arasında yeni bir beynəlxalq anlaşma qüvvəyə minib.

AzerVoice xəbər verir ki, anlaşma ilə bağlı qərar Rəcəb Tayyib Ərdoğan tərəfindən imzalanıb və 23 aprel 2025-ci il tarixində “Resmî Gazete”də dərc olunaraq rəsmiləşdirilib.

İki ölkə arasında diplomatik əlaqələrin gücləndirilməsi baxımından mühüm əhəmiyyət daşıyan bu sənədin təsdiqi ilə münasibətlərin yeni mərhələyə qədəm qoyacağı gözlənilir.

Ərdoğanın imzası ilə yayımlanan 9755 saylı qərara əsasən, Türkiyə ilə Maldiv Adaları arasında imzalanmış razılaşma beynəlxalq hüquqi qüvvə qazanır. Bu qərar tərəflər arasında uzunmüddətli əməkdaşlığın hüquqi əsaslarını təmin edir və qarşılıqlı əlaqələrin inkişafı üçün yeni imkanlar yaradır.

Rəsmi məlumatda bildirilir ki, sənəd Türkiyə Respublikasının daxili hüquqi prosedurlarına uyğun şəkildə təsdiqlənib. Eyni zamanda, bu addımın iki ölkə arasında siyasi, iqtisadi, texniki və mədəni sahələrdə əməkdaşlığın daha da dərinləşməsinə xidmət edəcəyi vurğulanır.

Qeyd edək ki, Maldiv Adaları ilə imzalanmış bu beynəlxalq anlaşma Ankaranın qlobal tərəfdaşlıq xəttinə uyğun yeni bir diplomatik addım kimi qiymətləndirilir.