BAKI, AzerVoice, Nailə Babazadə

İranın islahatçı lideri Mehdi Kərrubi bəzi parlament üzvlərini Rusiya prezidenti Vladimir Putinə “həddindən artıq sədaqət” göstərməkdə ittiham edib.

AzerVoice xəbər verir ki, bu bəyanat parlament sədri Məhəmməd Bağır Qalibafın bir neçə gün əvvəl ölkə daxilindəki tərəfləri Rusiya–İran münasibətlərinə “ziyan vurmaq təhlükəsi” barədə xəbərdarlığından sonra səslənib.

İslahatçı mediada yayılan açıqlamalarında Kərrubi, təhlükəsizlik və hərbi qurumların siyasi və iqtisadi fəaliyyətlərini də tənqid edib. O bildirib ki, “islahatçıların illər əvvəl səsləndirdiyi xəbərdarlıqlar bu gün gerçəkliyə çevrilib”.

“Bəzi hərbçilər parlamentdə Putinə sədaqət nümayiş etdirmək uğrunda bir-biri ilə yarışırlar.” O, istehza ilə əlavə edib: “Hakimiyyətdə Kommunist Tudeh Partiyası olsaydı belə, ruslara bu qədər həddindən artıq dəstək verməzdi.”-deyə Kərrubi bildirib.

Kərrubinin bu sözləri Qalibafın sabiq prezident Həsən Ruhani və onun xarici işlər naziri Məhəmməd Cavad Zərifi Tehran–Moskva strateji əlaqələrinə zərər vurmaqda ittiham edən bəyanatlarına cavab xarakteri daşıyır.