BAKI, AzerVoice, Nailə Babazadə

İran Xarici İşlər Nazirliyinin sözçüsü İsmayıl Bəqai bildirib ki, İranın Xarici İşlər nazirinin müavini Kazim Qəribabadi Əfqanıstana səfər edərək iki ölkə arasındakı münasibətlərin gündəliyində olan bir sıra məsələləri, o cümlədən sərhəd təhlükəsizliyini müzakirə edib.

AzerVoice xəbər verir ki, Bəqai bu açıqlamanı Tehranda keçirdiyi həftəlik mətbuat konfransında verib. O qeyd edib ki, Qəribabadinin səfəri sərhəd təhlükəsizliyi, su hüquqları, həmçinin hüquqi və məhkəmə əməkdaşlığı kimi mövzuların müzakirəsinə həsr olunub. Bu üç məsələ müvafiq Əfqan rəsmiləri ilə görüşlərdə xüsusi diqqətə alınıb.

Səfər zamanı həmçinin uzun müddət dayandırılmış sərhəd nişanlarının bərpası planının icrasına yenidən başlanılması barədə razılıq əldə olunub.

Bəqai qeyd edib ki, qeyri-qanuni hərəkətlər, narkotik və insan qaçaqçılığı, həmçinin digər transmillətli cinayətlərin qarşısının alınması yolları barədə də konstruktiv müzakirələr aparılıb. O, ümid etdiyini bildirib ki, son görüşlər iki ölkə arasında müxtəlif sahələrdə daha geniş əməkdaşlığın inkişafına töhfə verəcək.