BAKI, AzerVoice, Nailə Babazadə
Livanın Baş naziri Nəvvaf Səlam cümə günü bildirib ki, hökumət Fələstin düşərgələrindəki silahlanma məsələsi ilə bağlı ciddi addımlar atıb və bir daha vurğulayıb ki, silah yalnız dövlətin əlində olacaq və bu mövzuda geri dönüş yoxdur.
AzerVoice xəbər verir ki, rəsmi “Livan Milli İnformasiya Agentliyi”nin məlumatına görə, bunu Səlam təhlükəsizlik vəziyyəti və silahın təkcə dövlət tərəfindən idarə olunmasına dair sualı cavablandıraraq deyib.
“Qərar qəbul edilib, ordu bizə icra planını təqdim edib və bir həftədən az müddətə ordu komandanından yeni hesabat gözlənilir. Silahın dövlətin əlində cəmləşdirilməsi qərarından geri dönüş yoxdur.Fələstin düşərgələrindəki silahlarla bağlı ciddi addımlar atmışıq və artıq 20-dən çox yük maşını dolu ağır silah təhvil verilib. Bu proses davam edir və hələ başa çatmayıb.”-deyə o bildirib.
Livan Baş naziri ölkədə növbəti parlament seçkilərinin konstitusion müddətində keçiriləcəyini təsdiqləyib və bunun “müzakirə mövzusu olmadığını” bildirib.
Səlam həmçinin İsrailin Livana qarşı “esklasiyası” məsələsinə toxunub.
“Ölkəmiz atəşkəsin Monitorinq Komissiyası, eləcə də ərəb və beynəlxalq əlaqələr vasitəsilə bütün imkanlarımızı səfərbər edir ki, İsrail pozuntularını dayandıraq və düşmənçilik əməliyyatlarının dayandırılması razılaşmasına qayıdaq.”-deyə o əalvə edib.
Livan Səhiyyə Nazirliyi bildirib ki, cümə axşamı gününün əvvəlində İsrail qüvvələrinin cənubdakı Bleydə (Bleyda) qəsəbəsinə daxil olması zamanı bir mülki şəxs güllələnərək öldürülüb. Bu hadisədən sonra Livan Prezidenti Cozef Aun, ordu komandanı Rudolf Heykə cənubda baş verən hər hansı İsrail daxilolmalarının qarşısının alınması göstərişi verib.
İsrail ordusu isə bildirib ki, onların qüvvələri “Hizbullahın infrastrukturunu məhv etmək” əməliyyatı çərçivəsində Bleyda qəsəbəsindəki bir binada “şübhəli şəxsi” aşkar ediblər və “dövüşçülərə birbaşa təhlükə yarandığı üçün atəş açılıb”.
Keçən ilin noyabrında ABŞ vasitəçiliyi ilə İsrail və “Hizbullah” arasında atəşkəs əldə edilmişdi. Lakin razılaşmaya baxmayaraq İsrail hələ də Livanın cənubundakı bəzi mövqelərə nəzarəti davam etdirir və ölkənin cənub və şərq bölgələrinə hücumlar həyata keçirərək “Hizbullahı” atəşkəsi pozmaqda ittiham edir.