BAKI, AzerVoice, Nailə Babazadə
İran Xarici İşlər Nazirliyinin sözçüsü Birləşmiş Millətlər Təşkilatının (BMT) 80 illiyi münasibətilə çıxış edərək bildirib ki, İran millətlərin hüquqlarını həqiqətən təmsil edən və ədalət uğrunda dayanan bir BMT-yə inanır.
AzerVoice xəbər verir ki, bazar ertəsi Xarici İşlər Nazirliyinin Siyasi və Beynəlxalq Araşdırmalar İnstitutunda keçirilən mərasimdə çıxış edən İsmayıl Baqai deyib ki, hazırkı qlobal vəziyyət bəzi güclərin BMT Nizamnaməsinin əsas prinsiplərinə əməl etməməsinin nəticəsidir.
O xatırladıb ki, BMT “dəhşətli bir dünya müharibəsinin külü üzərində” qurulub – bu, insanlığın ağrılı təcrübələrini yada salan və oxşar faciələrin təkrar yaşanmaması üçün verilmiş bir öhdəlik idi.
“İndi geri çəkilmək və ya biganə qalmaq vaxtı deyil. Biz ədalətə inanırıq; millətlərin hüquqlarının əsl təmsilçisi olan bir BMT-yə inanırıq,” – deyə Baqai bildirib.
O qeyd edib ki, BMT-nin əsas missiyası – beynəlxalq sülh və təhlükəsizliyin qorunması – bir neçə güclü dövlətin birtərəfli və öz maraqlarına xidmət edən davranışları səbəbindən zəifləyib.
Baqainin sözlərinə görə, BMT Nizamnaməsinin məqsəd və prinsipləri, xüsusilə Təhlükəsizlik Şurasında, bu prinsiplərin qoruyucusu olmalı olanlar tərəfindən təhrif edilir və pozulur.
Baqai ABŞ-ı və onun bəzi müttəfiqlərini BMT Nizamnaməsinin “ən böyük pozucuları” adlandıraraq, onların İsrailin fələstinlilərə qarşı davam edən müharibəsinə verdikləri dəstəyə diqqət çəkib.
“Son iki ildə İsrail rejimi işğal altındakı Fələstin ərazilərində tarixdəki ən genişmiqyaslı soyqırımlardan birini həyata keçirərkən, eyni zamanda bir neçə ölkəyə hərbi hücumlar edib və terror aktları törədib. Bütün bunlar ABŞ və bəzi Avropa dövlətlərinin tam dəstəyi və iştirakı ilə baş verir.” - deyə Bəqai qeyd edib.
Sözçü həmçinin ABŞ-ın Latın Amerikasında yürüdüyü siyasəti pisləyərək bildirib ki, Vaşinqtonun Venesuela, Kuba və digər ölkələrə qarşı müdaxilələri və təhdidləri beynəlxalq hüququ və sülhü pozur.
Baqai vurğulayıb ki, İran hər zaman sülhün, ədalətin, insan ləyaqətinin və millətlər arasında dostluq münasibətlərinin sadiq müdafiəçisi olub və onilliklər boyu qarşılaşdığı qərəz və ədalətsiz münasibətlərə baxmayaraq, BMT-nin məsuliyyətli üzvü kimi fəaliyyətini davam etdirir.
Çox tərəfli əməkdaşlığa sadiqliyini bir daha təsdiqləyən Baqai deyib: “Biz heç vaxt Birləşmiş Millətləri təsirsiz bir qurum hesab etməmişik, nə də onun institutlarını təhdid etmişik. Gəlin, müharibənin bəşəriyyət üçün fəlakətinə yol verməyəcək bir BMT qurmaq öhdəliyimizi yeniləyək — həm bu nəsil, həm də gələcək nəsillər üçün.”