BAKI,AzerVoice, Fərid Mikayılov

Qəzzaya humanitar yardım aparmaq məqsədilə yola çıxan, lakin İsrail ordusu tərəfindən beynəlxalq sularda zorla saxlanılan Əzm Donanmasının 42 könüllüsü İsrail həbsxanalarında toplu aclıq aksiyasına başlayıb.

AzerVoice xəbər verir ki, Donanmanın ABŞ mərkəzli X platformasındakı rəsmi hesabında yayılan açıqlamada bildirilib ki, 42 könüllü İsrailin müxtəlif həbsxanalarında eyni vaxtda aclıq aksiyasına başlayıb.

Açıqlamada qeyd olunur ki, aksiya “Fələstin xalqı ilə həmrəylik” məqsədi daşıyır.

Xatırladaq ki, İsrail ordusu oktyabrın 1-də Əzm Donanmasına hücum edərək donanmanın sonuncu gəmisi olan “Marinette”ni beynəlxalq sularda qanunsuz şəkildə ələ keçirib.

BMT-nin İnsan Hüquqları üzrə Ali Komissarlığının sözçüsü Thameen Al-Kheetan məsələ ilə bağlı açıqlama verib.

“Donanma iştirakçılarına qarşı pis rəftar və onların hüquqlarının pozulması ilə bağlı narahatedici məlumatlar almışıq”- deyə o bildirib.

O, həmçinin vurğulayıb ki, İsrail həbsxanalarında və saxlanma mərkəzlərində 2023-cü ildən bəri aşağılayıcı davranış və qeyri-insani şəraitin davam etməsi ciddi narahatlıq doğurur.

“Azadlığından məhrum edilən bütün şəxslərə insan ləyaqətinə uyğun davranılmalıdır” – deyə Al-Kheetan əlavə edib.