BAKI,AzerVoice, Nailə Babazadə
Birləşmiş Millətlər Təşkilatı (BMT), Sudanın Kurdofan bölgəsində zorakılığın və mülki əhaliyə yönəlik təhlükənin artdığını bildirərək, Cənubi Kurdofan əyalətinin Kadugli şəhərində aclıq şəraitinin qeydə alındığını və bunun digər bölgələrə yayılma riski olduğunu xəbərdar edib.
AzerVoice xəbər verir ki, bu barədə BMT Baş katibinin sözçüsü Stefan Düjarrik gündəlik mətbuat konfransında çıxış edərkən bildirib.
Düjarrik bildirib ki, BMT-nin humanitar yardım komandaları Kurdofanda artan zorakılıqla yanaşı mülki əhali üçün də təhlükənin yüksəldiyi barədə xəbərdarlıq ediblər. “Sudandakı humanitar yardım heyəti, bütün Kurdofan boyunca artan zorakılığı və bir çox şəhəri təcrid edən mühasirələri ən sərt şəkildə qınayan bir bəyanat yayıb”, – deyə o vurğulayıb.
Onun sözlərinə görə, humanitar yardım işçiləri Cənubi Kurdofandakı Kadugli və Delenc şəhərlərində insanların son dərəcə ağır çətinliklərlə, ciddi hərəkət məhdudiyyətləri ilə və əsas xidmətlərə və qorunmaya məhdud çıxışla üzləşdiyini bildiriblər.
“Kaduglidə aclıq şəraiti müəyyən edildiyi halda, Qərbi Kurdofan əyalətinin Babanusa şəhərində də davamlı hücumlar qeydə alınıb”, – deyə Düjarrik bildirib və aclığın Kurdofanın digər bölgələrinə yayılma riski olduğunu vurğulayıb.
Düjarrik qeyd edib ki, yardım işçiləri Kurdofan bölgəsində yaşayan təxminən 1,1 milyon insana əsas yardımı çatdırmaq üçün qeyri-adi risklərlə üz-üzə qalırlar.
O, münaqişədə iştirak edən tərəflərə humanitar yardım işçilərini və mühasirə altındakı bölgələrdən qaçan mülki şəxsləri qorumaq çağırışı edərək, “Ehtiyacı olan hər kəsə təhlükəsiz və fasiləsiz çıxış təmin etmələri vacibdir”, – deyib.
Qeyd edək ki,Sudanda 15 aprel 2023-cü ildən bəri ordu ilə xaricdən dəstəklənən Sürətli Dəstək Qüvvələri (RSF) arasında şiddətli toqquşmalar davam edir.
Ölkənin qərbində yerləşən Darfur bölgəsinin ən böyük şəhəri Fəşir, ağır döyüşlərdən sonra əsasən RSF-nin nəzarətinə keçib.
On minlərlə insanın döyüşlərdən qaçdığı şəhərdə HDK-nın mülki şəxsləri zorla yerindən çıxardığı, çox sayda silahsız insanı öldürdüyü və işgəncə verdiyi anlar HDK üzvlərinin paylaşdığı videolarda əks olunub.