BAKI, AzerVoice, Fərid Mikayılov
Fransa mədəniyyət naziri Raşida Dati, Parisin isti hava dalğaları zamanı Avropanın ən ölümcül paytaxtı olduğunu iddia edib. Onun sözləri Paris bələdiyyə rəhbərliyinin iqlim siyasəti ilə bağlı siyasi mübahisələr fonunda gündəmə gəlib.
AzerVoice xəbər verir ki, nazir, paytaxtın iqlim planlarının mövcud olmasına baxmayaraq, sosialist meri Ann İdalqo administrasiyasının isti dalğaları idarə etməkdə uğursuz olduğunu qeyd edib.
Datinin arqumentləri 2023-cü ildə Lancet tibb jurnalında dərc olunan “İsti və soyuğa aid edilən artıq ölüm halları” adlı araşdırmaya əsaslanır. 2000–2019-cu illərin məlumatlarını əhatə edən bu tədqiqat 854 Avropa şəhərində isti və soyuq dalğalarının təsirini qiymətləndirib.
Nəticələrə görə:
- London soyuq hava dalğaları zamanı ən çox ölüm qeydə alınan paytaxtdır.
- Paris isə isti hava dalğaları zamanı ən çox ölüm hadisəsi ilə qarşılaşıb.
Xüsusilə 2003-cü ildə baş verən ekstremal istilər minlərlə insanın həyatına son qoymuşdu.
Bəzi tədqiqatlarda isə Milan və Barselona kimi paytaxt olmayan şəhərlərdə isti dalğalar zamanı Parisdən daha çox ölüm faktı qeydə alındığı vurğulanır.
Mütəxəssislər bunun səbəbini “kentsel istilik adası” fenomeni ilə izah edirlər. Beton, asfalt və tikili səthlər istiliyi daha çox udur və saxlayır, bu da yüksək əhali sıxlığı və yaşıllığın azlığı ilə birlikdə ölüm riskini artırır.
Londondakı Tropik Xəstəliklər Məktəbinin dosenti və araşdırmanın müəlliflərindən biri Malkolm Mistri bildirib ki, Paris və digər şəhərlərdə müşahidə edilən ekstremal istilər həm təbii iqlim dəyişkənliyi, həm də insan fəaliyyəti nəticəsində yaranan iqlim dəyişikliyinin təsirindən qaynaqlanır.
Onun sözlərinə görə, Cənubi Avropa və Aralıq dənizi bölgəsi coğrafi mövqeyinə görə daha çox isti dalğalarına məruz qalır.