BAKI, AzerVoice
Tramp administrasiyası Harvard Universitetinin beynəlxalq tələbə qəbulunu dayandırıb.
AzerVoice xəbər verir ki, ABŞ
prezidenti Donald Trampın rəhbərlik etdiyi administrasiya Harvard
Universitetinin beynəlxalq tələbə qəbulunu "qanunlara uyğun
gəlmədiyi" səbəbilə dayandırıb.
Qərarın əsas səbəbi kimi universitetin Fələstinə dəstək
aksiyalarına səssiz qalması və antisemitizm ittihamları
göstərilib.
Qeyd edək ki, ABŞ Daxili Təhlükəsizlik Naziri Kristi Noem bu barədə rəsmi məktubla Harvard rəhbərliyini məlumatlandırıb. O, X (keçmiş Twitter) hesabında paylaşdığı açıqlamada, “Harvard Universitetinin Tələbə və Mübadilə Proqramı sertifikatı ləğv edilib və bu qərar dərhal qüvvəyə minib”- deyə bildirib.
Noem bildirib ki, universitetin "kampusda zorakılığı və antisemitizmi təşviq etdiyi", eləcə də "Çin Kommunist Partiyası ilə koordinasiyada olduğu" iddia olunur. Onun sözlərinə görə, beynəlxalq tələbə qəbuluna sahib olmaq bir hüquq deyil, imtiyazdır və Harvard bu imtiyazı itirib.
Tramp administrasiyası eyni zamanda Harvard üçün nəzərdə tutulan 2,2 milyard dollarlıq federal maliyyəni və 60 milyon dollarlıq müqavilə haqqını da dondurmaq qərarına gəlib. Universitet bu qərarın qeyri-qanuni olduğunu bildirərək məhkəməyə müraciət edib.
Xatırladaq ki, ABŞ-da bir sıra universitetlər, o cümlədən Harvard, Fələstinə dəstək aksiyalarına səhnə olub. Bu fonda federal hökumət "Antisemitizmlə Mübarizə Qrupu" yaradaraq bir neçə dövlət qurumu ilə universitetlərə təzyiqləri artırıb.
