BAKI, AzerVoice

Günəşdə baş verən X2.7 sinifli partlayış Yer kürəsində rabitə sistemlərinə təsir edib, mütəxəssislər daha güclü partlayışların baş verə biləcəyi ilə bağlı xəbərdarlıq edirlər.

AzerVoice xəbər verir ki, mayın 14-də Günəşin səthində qeydə alınan X2.7 sinifli alışma 2025-ci ilin indiyə qədər baş vermiş ən güclü günəş alovudur.

ABŞ-ın Milli Okean və Atmosfer Administrasiyasının (NOAA) Kosmik Hava Proqnozları Mərkəzinin məlumatına görə, partlayış AR4087 adlı günəş ləkəsi ilə əlaqələndirilir və nəticədə yüksək tezlikli radio siqnallarında fasilələr müşahidə olunub.

Rentgen və ultrabənövşəyi şüalanmanın artması səbəbindən Günəşin elektromaqnit təsiri atmosferin yuxarı qatlarında ionlaşmaya yol açıb. Bu isə Avropa, Asiya və Yaxın Şərqdə müvəqqəti rabitə kəsintilərinə səbəb olub. Partlayışın ən güclü təsiri Türkiyə vaxtı ilə saat 11:25-də qeydə alınıb.

Süni intellekt modellərinə əsasən, bu partlayışın enerjisi təxminən 10 milyard ton TNT partlayıcısına bərabər hesab olunur. Space.com-un məlumatına görə, X sinifli alovlar Günəşdə ən güclü partlayışlar hesab edilir və X2.7 səviyyəsi bu kateqoriya daxilində "orta dərəcədə güclü" olaraq qiymətləndirilir.

Mütəxəssislər bu hadisə ilə yanaşı, koronal kütlə atılmasının (CME) da baş vermiş ola biləcəyini ehtimal edirlər. CME-lər Yerin maqnit sahəsinə çatdığı halda, maqnit fırtınalarına və şimal işıqları kimi təbiət hadisələrinə səbəb ola bilər.

Hazırda AR4087 bölgəsi Günəşin Yerdən uzaq səthində yerləşsə də, onun yaxın günlərdə Yerə baxan tərəfə doğru fırlanacağı gözlənilir. Bu isə yeni və daha şiddətli partlayış ehtimalını artırır. Artıq həmin bölgədə M5.3 sinifli növbəti bir partlayış da baş verib.

“Aktiv bölgə getdikcə daha çox görünür. Gözləyib nəticəsini izləmək lazımdır”- deyə Avrora müşahidəçisi Vinsent Ledvina sosial şəbəkədə bildirib.