BAKI, AzerVoice

Marsda 16 min kilometrə qədər uzanan qədim çay yataqları aşkar edilib.

AzerVoice xəbər verir ki, alimlər Marsın cənub dağlıq bölgəsində təxminən 16.000 kilometr uzunluğunda qədim çay izləri aşkarlayıb.

Bu tapıntı Qırmızı Planetin bir vaxtlar indiki qədər quraq deyil, əksinə nəmli və aktiv su dövranına malik olduğunu sübut edir.

Açıq Universitetin doktorantı Adam Losekoot və komandası bu izləri NASA-nın Mars Reconnaissance Orbiter (MRO) və Mars Global Surveyor peyklərinin çəkdiyi görüntülərlə aşkar ediblər. Tədqiqat ərazisi Avstraliyadan daha böyük – 10 milyon kvadrat kilometr sahəni əhatə edir.

Ən maraqlısı odur ki, bu çay izləri daha öncə suyun mövcudluğuna dair heç bir dəlilin olmadığı düşünüldüyü Noachis Terra adlanan bölgədə tapılıb. Tədqiqatçılar izləri “flüviyal sinusoidal silsilələr” adlandırır – zamanla sərtləşmiş və ətraf mühitin aşındırması nəticəsində üzə çıxmış qədim çay yataqları.

Bu izlərə əsasən, Marsda suyun tarixi təxminən 3,7 milyard il əvvələ gedib çıxır. Həmin dövrdə planetin atmosferi daha qalın olmuş və səthində maye su mövcud ola bilərdi. Lakin maqnit sahəsinin zəifləməsi nəticəsində atmosfer aşınıb və suyun çoxu kosmosa buxarlanıb.

Qeyd edək ki, alimlər Marsın dərin qatlarında hələ də yeraltı su ehtiyatlarının mövcud ola biləcəyini düşünürlər. Bu isə keçmişdə Marsda həyat üçün əlverişli mühitin ola biləcəyini göstərir.