BAKI, AzerVoice

NASA-nın Parker Günəş Zondu Günəşin səthinə rekord yaxın məsafədə ikinci dəfə uçuş edib.

AzerVoice xəbər verir ki, Parker zondu 22 mart 2025-ci ildə Günəşin səthinə cəmi 6,1 milyon kilometr yaxınlaşıb.

Bu, insan tərəfindən yaradılan bir cismin Günəşə çatdığı ən yaxın məsafədir. Zond eyni zamanda saatda 192 kilometr sürətlə hərəkət edərək süni obyektin əldə etdiyi ən yüksək sürətə çatıb.

NASA-nın məlumatına görə, Parker Günəş Zondu bu yaxın keçid zamanı Günəşin atmosferinə daxil olub və kritik məlumatlar toplayıb. Missiyanın idarəedici qrupu 25 martda zondla əlaqə saxlayaraq, onun sistemlərinin normal işlədiyini təsdiqləyib.

2018-ci ildə buraxılan Parker Günəş Zondu Günəşin atmosferini, maqnit sahələrini və hissəcik axınlarını öyrənmək məqsədilə getdikcə yaxınlaşan orbitlərdə uçuşlar həyata keçirir. Bu missiyanın uğurla davam etməsi üçün zond xüsusi istilik qalxanı ilə təchiz edilib. Bu texnologiya, Günəş atmosferinin milyonlarla dərəcə isti olduğu bölgələrdə belə Parkerin fəaliyyətini qorumağa imkan verir.

NASA-nın planlarına əsasən, Parker 6,1 milyon kilometr məsafədən daha üç uçuş edəcək. Növbəti keçid 19 iyunda baş tutacaq, ardınca isə 15 sentyabr və 12 dekabr tarixlərində daha iki uçuş planlaşdırılır. Lakin alimlər missiyanın bu tarixlərdən sonra uzun müddət davam edə bilməyəcəyini bildirirlər.

Qeyd edək ki, missiyanın baş müstəntiqi Castin Kasper Parker Günəş Zondunun orbitini saxlamaq üçün bir gün yanacağının tükənəcəyini və Günəş tərəfindən çəkilərək yanacağını bildirib. Bununla belə, karbon istilik qoruyucusunun və bəzi hissələrin həddindən artıq temperaturda da dözə biləcəyi, onların ərimiş kütlə kimi Günəş ətrafında bir milyard il boyunca dövr edəcəyi qeyd edilir.