BAKI,AzerVoice, Orxan Qədirzadə
İsrail ABŞ-ın Venesuelaya qarşı həyata keçirdiyi hərbi əməliyyat və ölkə prezidenti Nikolas Maduronun saxlanılması ilə bağlı iddialara münasibət bildirib.
AzerVoice xəbər verir ki, İsrailin xarici işlər naziri Gideon Saar sosial şəbəkə üzərindən yaydığı açıqlamada ABŞ-ın Venesuelada həyata keçirdiyi addımları “təqdir etdiklərini” və “əziyyət çəkən Venesuela xalqının yanında olduqlarını” bəyan edib.
Saar bildirib ki, ABŞ Prezidenti Donald Tramp rəhbərliyi altında Vaşinqton “azad dünyanın lideri kimi hərəkət edir”. O, İsrailin Maduro hakimiyyətinin devrilməsini müsbət qiymətləndirdiyini və gələcəkdə İsrail ilə Venesuela arasında dostluq münasibətlərinin qurulacağına ümid etdiklərini qeyd edib.
Nazir əlavə edib ki, İsrail Venesuela xalqının siyasi və iqtisadi çətinliklərdən qurtulmasını dəstəkləyir.
Qeyd edək ki, İsrail bundan əvvəl də Maduro hökumətini tənqid edib və 2025-ci il Nobel Sülh Mükafatının Venesuela müxalifət lideri Maria Korina Maçadoya verilməsini məmnunluqla qarşıladığını açıqlamışdı.
Maçadonun İsrailə açıq dəstəyi və Baş nazir Binyamin Netanyahu hökuməti ilə yaxın münasibətləri beynəlxalq ictimaiyyətdə geniş müzakirələrə səbəb olmuşdu.
Məlumata görə, Venesuelanın paytaxtı Karakas şəhərində yerli vaxtla gecə saatlarında partlayış səsləri və hərbi təyyarələrin uçuşu eşidilib. Venesuela hakimiyyəti baş verənlərdən sonra ABŞ-ı ölkənin müxtəlif bölgələrində mülki və hərbi obyektlərə zərbələr endirməkdə ittiham edib.
ABŞ Prezidenti Donald Tramp Venesuelaya qarşı “genişmiqyaslı hərbi əməliyyat” aparıldığını və Nikolas Maduro ilə həyat yoldaşı Silca Floresnin ölkədən çıxarıldığını açıqlayıb.
ABŞ-ın ədliyyə naziri Pam Bondi isə Maduro və həyat yoldaşı barəsində ABŞ-da cinayət işi açıldığını, ona “narkotik terrorizmi, kokain qaçaqmalçılığı, ABŞ-a qarşı avtomatik silah və dağıdıcı qurğulara sahib olmaq” ittihamlarının irəli sürüldüyünü bildirib.
Venesuela hakimiyyəti baş verənlərə görə beynəlxalq ictimaiyyəti ABŞ-ı qınamağa çağırıb. Bir sıra ölkələr hücumu tənqid etsə də, ABŞ-ın addımlarını dəstəkləyən açıqlamalar da səsləndirilib.