BAKI,AzerVoice, Orxan Qədirzadə

İranın ali rəhbəri Ayətullah Əli Xamenei ölkədə bir həftədən artıqdır davam edən kütləvi etirazlar fonunda açıqlama verərək bildirib ki, “iğtişaşçılar yerində oturdulmalıdır”.

AzerVoice xəbər verir ki, 86 yaşlı Xameneinin şənbə günü səsləndirdiyi bu açıqlama son günlər İran İslam Respublikasını sarsıdan aksiyalar zamanı ən azı 10 nəfərin həlak olması fonunda gəlib. Etirazlar əsasən ölkədə ağırlaşan iqtisadi vəziyyətə qarşı yönəlib və hazırda səngimək əlaməti göstərmir.

ABŞ Prezidenti Donald Trump cümə günü İran rəhbərliyini xəbərdar edərək, əgər Tehran “dinc etirazçıları zorakılıqla öldürərsə”, Vaşinqtonun “onların köməyinə gələcəyini” bəyan edib.

Trampın bu açıqlamasının hansı formada və hansı miqyasda addımlarla müşayiət olunacağı hələlik aydın deyil. Analitiklər fikrincə ABŞ-ın Venesuelada həyata keçirdiyi genişmiqyaslı hərbi əməliyyatlar və prezident Nicolas Maduronun saxlanılması ilə bağlı iddialar fonunda bu bəyanat Tehranda ciddi narahatlıq yaradıb.

İran rəsmiləri Trampın bəyanatına sərt reaksiya veriblər. İranın BMT-dəki daimi nümayəndəsi Əmir Səid İravani BMT-nin baş katibinə və Təhlükəsizlik Şurasının sədrinə məktub ünvanlayaraq ABŞ Prezidentinin Tehrana qarşı “qanunsuz hədələrini” pisləməyi tələb edib.

Eyni zamanda, İranın Ali Milli Təhlükəsizlik Şurasının katibi Əli Laricani ABŞ-ın mümkün müdaxiləsinin “bütün regionda xaos yaradacağını və Amerikanın maraqlarının məhv edilməsi ilə nəticələnəcəyini” bildirib.

Qeyd olunur ki, hazırkı etirazlar miqyasına görə 2022-ci ildən bəri ölkədə baş verən ən geniş aksiyalar hesab olunur. Həmin il 22 yaşlı Mahsa Əmininin polis nəzarətində vəfatı İran üzrə kütləvi etirazlara səbəb olmuşdu.