Bakı,AzerVoice, Orxan Qədirzadə
Yəmənin paytaxtı Sənada husilərin nəzarətində olan məhkəmə 17 nəfəri xarici ölkələrə casusluqda ittiham edərək edam cəzasına məhkum edib.
AzerVoice xəbər verir ki, məhkəmənin hökmü şənbə günü husilərə bağlı SABA agentliyi tərəfindən açıqlanıb. Məhkəmə qərarına əsasən, hökmdə adı çəkilən şəxslər ABŞ, İsrail və Səudiyyə Ərəbistanı kəşfiyyatına bağlı “casus şəbəkəsinin üzvləri” kimi tanınıb və onların ictimai şəkildə güllələnməsi qərara alınıb.
Məlumata görə, daha bir kişi və qadın 10 il müddətinə azadlıqdan məhrum edilib, bir nəfər isə bəraət alıb. Hökm apellyasiya oluna bilər. Bu barədə təqsirləndirilən şəxslərdən bəzilərinin vəkili Əbdülbasit Ğazi məlumat verib.
İttihama əsasən, məhkum edilənlər 2024-2025-ci illər ərzində Yəmənlə düşmən münasibətdə olan ölkələrə casusluqda ittiham olunublar. Prokurorluq bildirib ki, həmin şəxslər ABŞ, Böyük Britaniya, İsrailin “Mossad” xidməti və Səudiyyə Ərəbistanı kəşfiyyatı ilə əməkdaşlıq ediblər.
SABA agentliyinin məlumatına görə, ittiham olunanlar dövlət rəsmilərinin hərəkətləri, obyektlərin koordinatları və raket sistemləri barədə məlumatları xarici tərəflərə ötürüb. Bunun nəticəsində müxtəlif hərbi və mülki obyektlərə zərbələr endirilib, onlarla insan həlak olub, infrastrukturda geniş dağıntılar baş verib.
Bu qərar husilərin nəzarətində olan ərazilərdə son illər həyata keçirilən mühakimə silsiləsinin növbəti mərhələsi hesab olunur. 2014-cü ildən başlayan vətəndaş müharibəsindən sonra İranın dəstəklədiyi husilər minlərlə şəxsi, o cümlədən BMT əməkdaşlarını həbs edib.
Son iki ildə husilər beynəlxalq təşkilatlar və xarici diplomatik missiyalarla əlaqəli şəxslərə qarşı kütləvi həbslər həyata keçiriblər. Hərəkat iddialarını casusluqla əsaslandırsa da, BMT bu ittihamları əsassız adlandırır.
Husilərin nəzarətində olan məhkəmələr əvvəllər də buna bənzər sərt hökmlər çıxarıb. 2021-ci ildə “Səudiyyə koalisiyası ilə əməkdaşlıqda” ittiham olunan doqquz nəfər edam edilmişdi. 2023-cü ildən isə hərəkat İsrail və Qırmızı dənizdəki gəmilərə qarşı raket və PUA hücumları həyata keçirməyə başlayıb.
ABŞ və İsrail buna cavab olaraq Yəməndə husilərə qarşı hava və dəniz əməliyyatları həyata keçirib. Hücumların birində isə qiyamçıların qurduğu hökumətin baş naziri və kabinənin böyük hissəsi öldürülmüşdü.