Bakı,AzerVoice, Orxan Qədirzadə

Ukrayna Prezidenti Vladimir Zelenski Holodomor qurbanlarının anım günü münasibətilə xalqa müraciət edib. AzerVoice xəbər verir ki, prezident bildirib ki, Ukrayna xalqı hər zaman öz müstəqilliyini qoruyub və bunu davam etdirəcək.

Zelenski qeyd edib ki, ölkədə bu gün saat 16:00-da Holodomor qurbanlarının xatirəsinə pəncərələrdə şamlar yandırılacaq.

Onun sözlərinə görə, Holodomor milyonlarla insanın həyatına son qoyub və bu faciə Ukraynanın milli yaddaşında mühüm yer tutur.

“Biz bilirik ki, milyonlarla insan aclıqdan öldürüldü. Bu gün də dəyişməyən Rusiya yenidən ölüm və dağıntı gətirir. Biz ölkəmizi müdafiə edirik və edəcəyik, çünki bu bizim evimizdir. Burada Rusiyanın hakimiyyətinə yer olmayacaq,” — Zelenski vurğulayıb.

Qeyd edək ki, 1932–1933-cü illərdə Sovet rəhbərliyinin tətbiq etdiyi kollektivləşdirmə və ərzaq siyasəti nəticəsində Ukraynada kütləvi aclıq baş verib. Ukrayna tərəfinin rəsmi məlumatına görə, Holodomor nəticəsində təxminən 4,5 milyon insan həlak olub.

Holodomor qurbanlarının Anım Günü hər il noyabrın dördüncü şənbə günü qeyd olunur.