BAKI,AzerVoice, Orxan Qədirzadə
Səudiyyə Ərəbistanında Kral Abdullah Elm və Texnologiya Universiteti (KAUST) Yaxın Şərqin ən güclü superkompüteri hesab olunan “Shaheen III” sistemini təqdim edib.
AzerVoice xəbər verir ki, ABŞ-ın Hewlett Packard Enterprise (HPE) şirkəti tərəfindən hazırlanmış sistem beynəlxalq TOP500 reytinqində Yaxın Şərqdə birinci, dünya üzrə isə 18-ci yerə yüksəlib. Reytinq yüksək performanslı hesablama texnologiyaları üzrə keçirilən SC25 konfransında elan edilib.
Məlumata görə, “Shaheen III” qurğusunun qrafik emal bölməsi 2026-cı ilin əvvəlində tam fəaliyyətə başlayacaq. Sistem keçən ay kommersiya və ixrac tələbətləri çərçivəsində ABŞ Ticarət Nazirliyinin nəzarəti ilə HPE-dən KAUST-a tam şəkildə təhvil verilib.
Yeni superkompüter Səudiyyə Ərəbistanının elmi araşdırmalar, yüksək performanslı hesablama və innovasiya sahəsində artan imkanlarını nümayiş etdirir. KAUST-un məlumatına görə, sistem universitet tədqiqatçılarının Krallığın elmi və texnoloji prioritetlərinə uyğun qlobal səviyyəli araşdırmalar aparmasına imkan verəcək.