BAKI, AzerVoice, Fərid Mikayılov

Pakistan Xarici İşlər Nazirliyi, Əfqanıstanla sərhəddə son günlərdə artan gərginliyin ardından 48 saatlıq müvəqqəti atəşkəs elan edib.

AzerVoice xəbər verir ki, qərar, Əfqanıstan hakimiyyətinin atəşkəs təşəbbüsü ilə razılaşdırılıb.

Pakistan ordusu Əfqan qüvvələrinə məxsus bir neçə hərbi post və tankı məhv etdiyini açıqlayıb. Hadisə, Spin Boldak (Əfqanıstan) və Çaman (Pakistan) sərhəd bölgələrində baş verib.

Pakistan Ordusunun İctimai Əlaqələr İdarəsinin (ISPR) məlumatına görə, Əfqan qüvvələrinin Hayber Paxtunxva ərazisindəki sərhəd postlarına hücumuna cavab olaraq altı tank məhv edilib və 25–30 nəfərin öldüyü ehtimal olunur.

Əfqan tərəfi isə sosial mediada Pakistan ordusuna məxsus texnikanın ələ keçirildiyi iddiasını yayaraq qələbə təəssüratı yaratmağa çalışıb. Lakin Pakistan rəsmiləri bu görüntüləri “saxta və əsassız” adlandırıb.

Pakistan ordusunun mətbuat xidməti Hindistanı da “təxribatçı bəyanatlar” verməkdə ittiham edib.

Açıqlamada bildirilir ki, Yeni Dehlinin Bihar və Qərbi Benqal ştatlarında keçiriləcək seçkilər ərəfəsində səsləndirdiyi hərbi ritorika regionun sabitliyini təhdid edir.

Pakistan və Əfqanıstan arasında son gərginlik Talibanın 2021-ci ildə hakimiyyəti ələ keçirməsindən sonra yeni səviyyəyə yüksəlib.

İslamabad hökuməti Talibanın Pakistan Talibanı (TTP) adlı silahlı qruplaşmaya qarşı tədbir görmədiyini bildirir.

Pakistan rəsmiləri TTP-nin Əfqanıstan ərazisində mövqe tutduğunu, oradan ölkə daxilinə hücumlar təşkil etdiyini vurğulayır. Kabil isə bu iddiaları rədd edir və TTP-nin öz ərazilərində fəaliyyət göstərmədiyini bildirir.