BAKI,AzerVoice
Dekabrın 3-də Dini Qurumlarla İş üzrə Dövlət Komitəsinin təşkilatçılığı ilə Göyçayda “Milli-mənəvi kimlik və müasir çağırışlar” mövzusunda regional konfrans öz işinə başlayıb.
AzerVoice xəbər verir ki, tədbirdən öncə konfrans iştirakçıları Ulu Öndər Heydər Əliyevin şəhərin mərkəzində ucaldılan abidəsini ziyarət edib, önünə gül dəstələri düzüblər.
Tədbirdə çıxış edən Göyçay Rayon İcra Hakimiyyətinin başçısı Orxan Mürsəlov bildirib ki, milli-mənəvi kimlik hər bir xalqın əsas dayaqlarından biridir. Azərbaycan Respublikasının Prezidenti cənab İlham Əliyevin rəhbərliyi ilə xalqımız 44 günlük Vətən müharibəsində qazandığı Zəfərlə birliyini və milli kimliyimizin gücünü bir daha təsdiqləyib. İnformasiya axınının sürətləndiyi müasir dövrdə dilimizə, dinimizə, mədəniyyətimizə, milli kimliyimizə qarşı yaranan təhdidlər barədə də danışan O.Mürsəlov vurğulayıb ki, bu reallıq milli dəyərlərin qorunmasının yalnız mənəvi deyil, həm də təhlükəsizlik məsələsi olduğunu deməyə əsas verir. İstənilən dövlətdə xalqın milli kimlik anlayışının zəifləməsi onun daxili və xarici təsirlərə qarşı həssaslığını sual altına qoyur. Buna görə də hər birimiz milli kimliyimizin möhkəmləndirilməsi üçün səylərimizi birləşdirməliyik. İcra başçısı çıxışının sonunda tədbirin əhəmiyyətini vurğulayaraq, əldə olunacaq nəticələrin gələcək fəaliyyət üçün mühüm töhfələr verəcəyinə və milli kimliyimizin qorunması istiqamətində daha sistemli addımların atılmasına şərait yaradacağına əminliyini ifadə edib.
Dini Qurumlarla İş üzrə Dövlət Komitəsinin sədri Ramin Məmmədov Ulu Öndər Heydər Əliyevin xalqımızın mənəvi və mədəni dəyərlərinə əsaslanaraq irəli sürdüyü azərbaycançılıq ideologiyasının əhəmiyyətini vurğulayıb. Bildirib ki, müasir dövrdə bu ideoloji xətt Azərbaycan Respublikasının Prezidenti cənab İlham Əliyevin rəhbərliyi altında uğurla davam etdirilir, milli-mənəvi dəyərlərin qorunması və gənc nəslin sağlam mənəviyyatla formalaşması istiqamətində ardıcıl tədbirlər həyata keçirilir. Eyni zamanda, Azərbaycan Respublikasının Birinci vitse-prezidenti Mehriban xanım Əliyevanın rəhbərlik etdiyi Heydər Əliyev Fondu humanitar, sosial və mədəni təşəbbüslərlə milli kimliyimizin qorunmasına mühüm töhfələr verir. Komitə sədri qloballaşmanın inteqrasiya, inkişaf üçün yaratdığı imkanlarla yanaşı, milli dəyərlərin aşınması və yad ideologiyaların sürətlə yayılması kimi ciddi təhdidlərə səbəb olması barədə də danışıb. Vurğulayıb ki, müasir informasiya mühitində dini və milli kimliklə bağlı ayrı-seçkilik yaratmaq cəhdlərinə də rast gəlinir. Təlim-tərbiyə sistemində gənclərin mənəvi dəyərlər əsasında formalaşması, rəqəmsal platformalarda maarifləndirici fəaliyyətin genişləndirilməsi və sosial statusundan asılı olmayaraq, hər birimizin milli-mənəvi irsimizə sahib çıxması vacibdir. Azərbaycanın multikulturalizm və tolerantlıq modeli məhz bu kontekstdə xüsusi rol oynayır. Bu model birgəyaşayış üçün nümunə olmaqla bərabər, milli birliyin, sosial harmoniyanın və dövlətçiliyin gücləndirilməsinə xidmət edən mexanizmdir.
Azərbaycan Respublikasının Prezidenti cənab İlham Əliyevin Sərəncamı ilə 2025-ci ilin Azərbaycanda “Konstitusiya və Suverenlik ili” elan olduğunu diqqətə çatdıran Milli Məclisin deputatı Sabir Hacıyev bildirib ki, 30 ilə yaxın müddət ərzində ərazilərimizin 20 faizi işğal altında idi. Lakin 5 il öncə Müzəffər Ali Baş Komandan, möhtərəm Prezidentimizin rəhbərliyi ilə rəşadətli ordumuzun, şəhid və qazilərimizin fədakarlığı sayəsində torpaqlarımız işğaldan azad edilib. Nəticədə ölkəmizin ərazi bütövlüyü və suverenliyi bərpa olunub. Azad olunmuş ərazilərimizdə bərpa olunan dini ibadət yerləri Azərbaycanın güclü dövlət olmasının bariz göstəricisidir.
Qafqaz Müsəlmanları İdarəsi sədrinin müavini Fuad Nurullayev qeyd edib ki, milli düşüncəyə sahib olan cəmiyyətin yüksəlişi üçün mənəviyyatın zənginləşdirilməsi vacibdir. Bunun üçün savad və bilik əsas şərtlərdəndir və din xadimləri bu məsələyə xüsusi diqqət göstərməlidirlər. O, Dini Qurumlarla İş üzrə Dövlət Komitəsinin tabeliyində fəaliyyət göstərən Mənəvi Dəyərlərin Təbliği Fondu tərəfindən məscidlərdə icra edilən “Hər məsciddə kitabxana” layihəsinin əhəmiyyətini vurğulayaraq bildirib ki, məscidlərin maarifləndirici funksiyasının gücləndirilməsi, milli-mənəvi və dini dəyərlərin təbliği, xüsusilə, gənclərin mütaliəyə təşviq olunması son dərəcə vacibdir. Məscidlərdə kitabxanaların yaradılması isə bu məkanların sosial və mədəni rolunu genişləndirərək, onları yalnız ibadət yeri deyil, həm də elm, bilik və maarifləndirmə mərkəzi kimi inkişaf etdirir.
Regional konfrans işini panel iclasları ilə davam etdirir.
