BAKI, AzerVoice, Nailə Babazadə

BMT-nin Uşaqlara Yardım Fondu (UNICEF) sözçüsü Rikardo Pires bildirib ki, İsrail ordusunun Qəzza zolağında həyata keçirdiyi hücumlar nəticəsində 64 mindən çox uşaq ya həyatını itirib, ya da yaralanıb.

Cenevrədə BMT Ofisinin həftəlik brifinqində çıxış edən Pires, bu gün başlayan atəşkəsin, Qəzzadaki uşaqlar üçün ümid işığı olduğunu bildirib.

"Bu gün, iki ildən artıqdır bu anı gözləyən, ağlasığmaz ağrılar çəkən 1 milyondan çox uşaq üçün bir dönüm nöqtəsi ola bilər," – deyə Pires qeyd edib.

UNICEF rəsmisi vurğulayıb ki, atəşkəs yalnız ilk addımdır və çox təcili və təsirli addımlar atılmalıdır.

"Münaqişənin bütün tərəfləri razılaşmanın tam həyata keçirilməsi üçün əllərindən gələni etməlidir. Atəşkəs uşaqların qətlinin və şikəst edilməsinin dayandırılacağına dair ümid yaradır. İsrailin hücumları nəticəsində 64 mindən çox uşaq həyatını itirib və ya yaralanıb. Onların təxminən 25 faizi ömürlük təsir göstərə biləcək xəsarətlər alıb." - deyə qeyd edib.

Pires əlavə edib ki, UNICEF yardım çatdırmağa tam hazırdır, lakin vəziyyət hələ də son dərəcə kritikdir.

"Uşaqlar arasında ölüm riski artır, çünki immun sistemləri zəifləyib və kifayət qədər qida ala bilmirlər. 50 min uşaq kəskin qidalanma çatışmazlığından əziyyət çəkir və dərhal müalicəyə ehtiyacları var."

UNICEF sözçüsü həmçinin İsrailin yardımların keçə bilməsi üçün mümkün qədər çox giriş nöqtəsi açmalı olduğunu vurğulayıb.

Pires, əvvəlki atəşkəs dövründə UNICEF-in nələrə nail olduğunu xatırladaraq, bu dəfə də uşaqlara tezliklə həyat qurtaran yardımların çatdırılacağına ümid etdiklərini bildirib.

Qeyd edək ki, İsrailin Təhlükəsizlik Kabineti Qəzzada əldə olunmuş atəşkəs razılaşmasını dünən axşam təsdiqləyib və ardınca İsrail ordusu bəzi işğal olunmuş ərazilərdən qismən geri çəkilməyə başlayıb.