BAKI, AzerVoice, Səməd Əyyubov

Ukrayna Donbasdan qoşunlarını çıxarmayacaq, çünki bu bölgə Ukrayna Silahlı Qüvvələrinin müdafiə xəttinin mühüm hissəsidir.

AzerVoice xəbər verir ki, bu barədə Ukrayna prezidenti Volodimir Zelenski açıqlama verib.

“Biz heç bir halda bu ərazini verə bilmərik. Bu, bizim müdafiə xəttimizin çox güclü hissəsidir. Biz belə hədiyyələr etməyəcəyik” – deyə, dövlət başçısı vurğulayıb.

Zelenski əlavə edib ki, Donbasdan imtina etməyə Ukrayna Konstitusiyası da imkan vermir.

Xatırladaq ki, bundan əvvəl Zelenski ABŞ prezidenti Donald Trampla telefon danışığı zamanı Rusiya ilə bağlı yeni təklifləri müzakirə edərkən, Donbasın tam şəkildə Rusiyaya verilməsinin mümkün olmadığını bildirib.

Tramp isə Alyaskada Rusiya prezidenti Vladimir Putinlə keçirdiyi sammitin nəticələri barədə Zelenskiyə məlumat verib və Moskvanın cəbhə xəttinin dondurulması müqabilində Ukrayna ordusunun Donbasdan çıxarılmasını təklif etdiyini söyləyib. Məlumata görə, Zelenski bu şərti qəbul etməyib və qeyd edib ki, “bu, mümkün deyil.”