BAKI, AzerVoice, Nərmin Ağayeva

ABŞ Prezidenti Donald Tramp Ağ Evdə Qəzza zolağının gələcəyi ilə bağlı müşavirləri ilə görüş keçirib.

AzerVoice xəbər verir ki, İclasda “Qəzzanın müharibədən sonrakı bərpası”, “bölgədəki siyasi vəziyyət” və “Həmassız Qəzza” ssenariləri müzakirə edilib.

Görüşdə Trampın Yaxın Şərq üzrə xüsusi nümayəndəsi Stiv Vitkoff, keçmiş müşaviri Cared Kuşner, Dövlət Katibi Marko Rubio və Britaniyanın keçmiş baş naziri Toni Bleyer iştirak edib. ABŞ mətbuatına istinadən, iclasda Qəzzanın humanitar böhrandan çıxışı və siyasi gələcəyi ilə bağlı çoxsaylı mövzular ətraflı şəkildə müzakirə olunub. X platformasında yayılan məlumatlar, görüşün Qəzzadakı vəziyyətin sabitləşdirilməsi və İsrailin təhlükəsizlik maraqlarının ön planda tutulduğunu göstərir.

ABŞ Dövlət Departamentinin açıqlamasına görə, Marko Rubio israilli həmkarı Gideon Saar ilə Vaşinqtonda görüşərək ABŞ-ın İsrailin təhlükəsizliyinə sadiqliyini təsdiqləyib. Görüşdə Qəzza, Livan və Suriyadakı vəziyyət, eləcə də İran təhlükəsinə qarşı birgə əməkdaşlıq müzakirə edilib. Rubio regionun təhlükəsizliyi və rifahı üçün sıx əməkdaşlığın vacibliyini vurğulayıb.

Qeyd edək ki, bu görüş İsrailin Fələstinə qarşı hərəkətləri və Qəzzadakı humanitar böhran fonunda keçirilib. Beynəlxalq ictimaiyyətin Qəzzadakı vəziyyətə etirazları davam edərkən, ABŞ-ın bu müzakirələri regionda sülh və sabitlik axtarışında yeni bir mərhələ kimi qiymətləndirilir.