BAKI, AzerVoice, Səməd Əyyubov

Almaniya kansleri Fridrix Mers ABŞ prezidenti Donald Tramp və Ukrayna prezidenti Volodimir Zelenski ilə görüşdə iştirak etmək üçün avqustun 18-də Vaşinqtona səfər edəcək.

AzerVoice xəbər verir ki, bu barədə Almaniya hökumətinin rəsmi nümayəndəsi Ştefan Kornelius məlumat verib.

Onun sözlərinə görə, səfərin məqsədi Trampın Alyaskada Putinlə keçirdiyi görüşdən sonra ABŞ Prezidenti ilə müzakirələr aparmaqdır. O, həmçinin qeyd edib ki, Mers digər dövlət və hökumət başçıları ilə Ukrayna münaqişəsinin həlli üzrə danışıqların gedişatını müzakirə edəcək və Almaniyanın tezliklə sülh sazişinin imzalanmasında maraqlı olduğunu vurğulayacaq.

Vaşinqton danışıqlarında, Almaniya hökumətinin nümayəndəsinin bildirdiyinə görə, təhlükəsizlik zəmanətləri, ərazi məsələləri və Ukraynaya bundan sonrakı dəstək müzakirə ediləcək. Kornelius əlavə edib ki, bu prosesdə sanksiya təzyiqinin qorunub saxlanması da gündəmdə olacaq.

Xatırladaq ki, Alyaskanın Ankoric şəhərində yerləşən “Elmendorf-Riçardson” hərbi bazasında iki liderin məhdud formatda görüşü baş tutub. Görüşdə Rusiya tərəfini Prezidentin köməkçisi Yuri Uşakov və xarici işlər naziri Sergey Lavrov, ABŞ tərəfini isə dövlət katibi Marko Rubio və Prezidentin xüsusi nümayəndəsi Stiven Uitkoff təmsil edib. Liderlər əvvəlcə qısa söhbət aparıb, daha sonra “üçə-üç” formatında əsas müzakirələrə keçiblər. Görüşdən sonra dövlət başçıları birgə mətbuat konfransında çıxış ediblər.

Sammitdən sonra Vaşinqtona qayıdan Tramp ardıcıl olaraq Ukrayna prezidenti Volodimir Zelenski, eləcə də Böyük Britaniya, Almaniya, İtaliya, Polşa, Finlandiya və Fransa liderləri, NATO baş katibi və Avropa Komissiyasının rəhbəri ilə telefon danışıqları aparıb.

Zelenski bazar ertəsi Vaşinqtonda Tramp ilə münaqişənin başa çatdırılması ilə bağlı detalları müzakirə edəcəyini bildirib. "The New York Times" nəşri yazır ki, Tramp Avropa liderlərini də Zelenski ilə keçirəcəyi görüşə qoşulmağa dəvət edib.