BAKI, AzerVoice, Nərmin Ağayeva

İsrail Baş Qərargah rəisi İrana sərt xəbərdarlıq edib.

AzerVoice xəbər verir ki, İsrail Baş Qərargah rəisi Eyal Zamir Təl-Əvivdəki Qlilot Hava Bazasında keçirilən hərbi mərasimdə çıxışı zamanı İranı hədələyib.

“Lazım gələrsə, yenidən İrana hücum etməyə hazırıq” - deyə o bildirərək, Tehrana qarşı yeni hərbi əməliyyatların mümkünlüyünü vurğulayıb.

Bu açıqlama, İranın ali dini lideri Ayətullah Əli Xameneinin müşaviri və Ali Milli Təhlükəsizlik Şurasının sədri Əli Laricaninin Beyrutda İsraili “yırtıcı” adlandırmasından sonra gəlib. Zamir İranın İsraili məhv etməyə yönəlmiş bir strategiya həyata keçirdiyini iddia edərək, “Biz sağ qalmağımız üçün ağır bədəl ödəməyə hazırıq” deyə vurğulayıb.

Xatırladaq ki, İsrail ordusu iyunun 13-də İranın nüvə proqramına qarşı zərbə həyata keçirdiyini və onlarla nüvə və hərbi obyektin vurulduğunu açıqlayıb. İran buna cavab olaraq İsrailə çoxsaylı PUA və raket zərbələri endirib. Hücumlarda İranın Baş Qərargah rəisi Məhəmməd Baqeri, İnqilab Keşikçiləri Komandiri Hüseyn Səlami və 9 nüvə alimi həlak olub.

Qeyd edək ki, ABŞ isə iyunun 22-də Natanz, Fordo və İsfahandakı üç nüvə obyektinə zərbə endirib. İran cavab olaraq Qətərdəki ABŞ-a məxsus Əl-Udeyd aviabazasını vurub. Ardınca ABŞ prezidenti Donald Tramp 12 günlük İsrail–İran müharibəsinin başa çatdığını və atəşkəsin əldə edildiyini elan edib.