BAKI, AzerVoice, Zeynəb Raminqızı

Hindistan hökuməti ABŞ prezidenti Donald Trampın Rusiya neftinin alınmasına görə yüksək tariflərlə hədələməsinə sərt cavab verib.

AzerVoice xəbər verir ki, bu barədə Hindistan Xarici İşlər Nazirliyi açıqlama yayıb.

Tramp “Truth Social” sosial media hesabında etdiyi paylaşımda Hindistanı Rusiya ilə enerji ticarətinə görə tənqid edərək, yüksək tariflər tətbiq edilə biləcəyini bildirib. O, Hindistanın “Rusiya Müharibə Maşını tərəfindən Ukraynada nə qədər insanın öldüyünə məhəl qoymadığını” deyərək ittiham irəli sürüb.

Bu açıqlama, Hindistana qarşı 25 faiz tarif tətbiq olunmasından bir neçə gün sonra gəlib. Tramp yeni tarifin dəqiq məbləğini açıqlamasa da, bu addım Vaşinqton və Nyu-Dehli arasında gərginliyi artırıb.

Hindistan Xarici İşlər Nazirliyinin sözçüsü Randhir Jaiswal “Biz Rusiyadan enerji almağa başladıq, çünki münaqişənin başlanmasından sonra ənənəvi tədarük kanalları Avropaya yönəldi. Bu, qlobal bazarda yaranan qeyri-sabitliyə cavab idi.”- deyə qeyd edib.

Nazirlikdən həmçinin bildirilib ki, Hindistan öz iqtisadi təhlükəsizliyini təmin etmək və enerji ehtiyaclarını qarşılamaq üçün Rusiya ilə enerji ticarətini davam etdirir.

"ABŞ özü də Rusiya ilə ticarət edir"- deyə o bildirib.

Hindistan rəsmiləri ABŞ-ın ikili standartlardan istifadə etdiyini bildirib. Onlar qeyd edir ki, ABŞ özü də sanksiyalara və tariflərə baxmayaraq, keçən il Rusiya ilə 3,5 milyard dollarlıq ticarət həyata keçirib.

Qeyd edək ki, Qərbin sanksiyaları fonunda Hindistan Rusiya neftinin əsas alıcısına çevrilib. Moskva üçün Hindistan hazırda ən vacib ixrac bazarlarından biridir. Analitiklər bildirirlər ki, Hindistanın mövqeyi həm iqtisadi, həm də geosiyasi maraqlara əsaslanır.

Bölgədə diqqət çəkən başqa bir inkişaf da yaşanıb. Yunanıstan Türkiyə sərhədinə yaxın ərazilərdə ABŞ-a yeni hərbi baza yerləşdirmək təklifi verib. Bu addımın regionda balanslara təsir göstərə biləcəyi bildirilir.