BAKI, AzerVoice, Səməd Əyyubov – Ukrayna Prezidenti Volodimir Zelenski general-leytenant Anatoli Krivonojkonu Ukrayna Silahlı Qüvvələrinin Hərbi Hava Qüvvələrinin komandanı təyin edib.

AzerVoice-un məlumatına görə, ötən ilin avqust ayından bəri Krivonojko bu vəzifəni müvəqqəti olaraq icra edirdi.

Zelenski Krivonoşkonun təyinatı ilə bağlı bildirib ki, Ukraynanın döyüş aviasiyası və hava hücumundan müdafiə qüvvələri Müdafiə Nazirliyi, Baş Qərargah, mütəxəssislər və beynəlxalq tərəfdaşlarla birgə şəkildə inkişaf etdirilməlidir. Onun sözlərinə görə, bu dəyişikliklərin əsas məqsədi Ukrayna üçün güclü və müasir müdafiə qüvvələrinin aviasiya hissəsini qurmaqdır. Bu aviasiya qüvvələri NATO qüvvələrinin bir hissəsinə çevriləcək və Avropanın ən güclü sistemlərindən biri olacaq.

Krivonojko bu vəzifədə general Nikolay Oleşçuku əvəz edib. Oleşçuk ötən ilin avqustu ayında prezidentin qərarı ilə vəzifədən azad olunmuşdu. Krivonojko bu təyinata qədər “Mərkəz” adlı hava komandanlığının rəhbəri idi.

Qeyd edək ki, Anatoli Krivonojko 60 yaşındadır. 2006–2008-ci illərdə 114-cü taktiki aviasiya briqadasının komandiri olub. 2015-ci ildə “Mərkəz” hava komandanlığının rəhbəri təyin edilib. 2016-cı ildə general-mayor, 2018-ci ilin oktyabrında isə general-leytenant rütbəsi alıb. O, Ukrayna Qəhrəmanı adına layiq görülüb.