BAKI, AzerVoice, Səməd Əyyubov

İran Xarici İşlər Nazirliyi, ABŞ və müttəfiqlərinin İrana qarşı səsləndirdiyi “xaricdəki müxaliflərə, jurnalistlərə və rəsmi şəxslərə qarşı sui-qəsd və qaçırma siyasəti” ittihamlarını əsassız hesab edərək qəti şəkildə rədd edib.

AzerVoice xəbər verir ki, bu barədə İran Xarici İşlər Nazirliyinin sözçüsü İsmayıl Bəqai açıqlama verib.

"Bu ittihamlar hazırda əsas məsələ olan – işğal olunmuş Fələstində baş verən soyqırım cinayətindən beynəlxalq ictimaiyyətin diqqətini yayındırmaq cəhdidir" - deyə, Bəqai bildirib. O, bu fikirlərlə İsrail və HƏMAS arasında Qəzzada davam edən müharibəyə işarə edib.

Qeyd edək ki, Böyük Britaniya və ABŞ, Fransa da daxil olmaqla daha 13 ölkə İran kəşfiyyat orqanlarının Avropa və Şimali Amerikada fərdlərə qarşı sui-qəsd, qaçırma və zorakılıq planları hazırladığını bildirərək bu fəaliyyətləri pisləyib.

“Avropa və Şimali Amerikada fərdləri öldürmək, qaçırmaq və onlara zərər vermək cəhdlərinə qarşı birgə mübarizə aparırıq. Bu, açıq şəkildə suverenliyimizin pozulmasıdır” - deyə, cümə axşamı yayımlanan birgə bəyanatda qeyd olunub.

Albaniya, Avstriya, Belçika, Kanada, Çexiya, Danimarka, Finlandiya, Fransa, Almaniya, Niderland, İspaniya, İsveç, Böyük Britaniya və ABŞ hökumətləri İranı bu qanunsuz fəaliyyətləri dərhal dayandırmağa çağırıblar.