BAKI, AzerVoice
Kreml sözçüsü Dmitri Peskov, ABŞ-ın Prezidenti Donald Trampın Ukraynada atəşkəs üçün Rusiyaya verdiyi “50 günlük” müddəti “10-12 günə” endirəcəyi barədə açıqlamasına münasibət bildirib.
AzerVoice xəbər verir ki, Peskov Rusiyanın Ukrayna məsələsinin sülh yolu ilə həllinə sadiq qaldığını vurğulayıb.
Moskva şəhərində jurnalistlərin suallarını cavablandıran Peskov “(Ukraynada) xüsusi hərbi əməliyyat davam edir. Biz bu məsələnin sülh yolu ilə həllinə və prosesdə Rusiya maraqlarının təmin edilməsinə sadiqik.”- deyə qeyd edib.
Peskov həmçinin Rusiya ilə ABŞ arasında münasibətlərin hazırkı vəziyyətinə toxunaraq bildirib ki, münasibətlər nə yaxşı, nə də pis sayılır.
Rusiya rəsmisi həmçinin ABŞ-la nüvə silahlarının məhdudlaşdırılması üzrə imzalanmış Yeni Strateji Silahların Azaldılması Müqaviləsi (Yeni START) çərçivəsində heç bir qarşılıqlı əlaqənin olmadığını da bildirib. O, buna səbəb kimi ikitərəfli münasibətlərdəki mövcud durumu göstərib.