BAKI, AzerVoice

İsrail HƏMAS-la aparılan danışıqlarda girovların azad olunması və Qəzzada atəşkəsə nail olunması məsələlərində heç bir güzəştə getmək niyyətində deyil.

AzerVoice xəbər verir ki, bu barədə İsrailin Baş naziri Benyamin Netanyahu bildirib.

"Əgər HƏMAS bizim razılığa gəlmək istəyimizi zəiflik kimi, İsrail üçün təhlükə yaradan kapitulyasiya şərtlərini diktə etmək imkanı kimi dəyərləndirirsə, onlar ciddi şəkildə yanılırlar" — deyə, Netanyahu vurğulayıb.

O əlavə edib ki, İsrail hərbi kampaniyanın bütün məqsədlərinə çatmaqda, o cümlədən bütün girovların geri qaytarılmasında qərarlıdır.

Netanyahu həmçinin İsrailin Suriyanın cənubunda yaşayan druz icmasını qorumağa hazır olduğunu bildirib.

Xatırladaq ki, iyulun 6-da Dohada atəşkəsin əldə olunması və Qəzzada saxlanılan israilli girovların azad olunması məqsədilə danışıqlar yenidən başlayıb.

HƏMAS atəşkəs danışıqlarının davam etdirilməsi məqsədilə vasitəçilərə son təklifə cavab verdiyini bildirib, lakin bu cavab barədə ətraflı məlumat verilməyib.

Daha sonra İsrail Baş naziri Benyamin Netanyahunun ofisi bildirib ki, HƏMAS-ın cavabını aldıqdan sonra İsrail də Dohadakı heyətini məsləhətləşmələr üçün geri çağırıb.